ಮನದೊಳಗೆ ಬಂದ ದೈವಕೆ - ರಚನೆ :ಶ್ರೀಮತಿ. ಶೈಲಜಾ ಕುಮಾರ್, ಮೈಸೂರು

ಮನದೊಳಗೆ ಬಂದ ದೈವಕೆ

ಮನೆಯೊಳಗೆ ಬಾರದ ಮನಸೇಕೆ !

ಮಗಿಲೊಳಗೆ ತುಂಬಿದ ಮಳೆಹನಿಗೆ

ಇಳೆಗೆ ಬಾರದ ಮುನಿಸೇಕೆ !

ತಪ್ಪು ಒಪ್ಪುಗಳೆಲ್ಲವು ನಿನಗೇ ಅರ್ಪಿತ

ಮಾನಸಮ್ಮಾನಕೆಲ್ಲ ನಿನದೇ ಅಂಕಿತ !

ಹೆಸರಿನೊಳಗಿನ ಉಸಿರೇ ನಿನ್ನದಯ್ಯ

ಇನ್ನಾದರೂ ತಡ ಮಾಡದೆ ಬಾರಯ್ಯ !!೧!!

ನಿನ ಪಾದದಡಿಯ ಕಣವು ನಾನು

ನನ್ನ ಪದಗಳೆಲ್ಲದರ ಭಾವವು ನೀನು !

ನಿನ್ನೊಂದು ದೃಷ್ಟಿಗೆ ಕಾದಿಹ ತೃಣವು ನಾನು 

ಬಂದೊಮ್ಮೆ ಉಣಿಸೋ ಭಕ್ತಿಯ ಜೇನು !! ೨!!

ನೀನಿದ್ದೆಡೆಯೇ ನಮಗೆ ಸುಖಧಾಮ 

ನಿನ್ನ ವಚನಗಳೇ ನಮಗೆ ಶಾಂತಿಧಾಮ !

ನೀನಿತ್ತ ವರಗಳೇ ನಮಗೆ ಚೈತನ್ಯಧಾಮ

ಬಂದೆಮ್ಮ ಗುರಿಮುಟ್ಟಿಸೋ  ಸೌಖ್ಯಧಾಮ !! ೩ !!

!! ಸರ್ವದಾ ಸದ್ಗುರುನಾಥೋ ವಿಜಯತೇ !!

೩೦-೧-೨೦೨೦

ಎನ್ನ ಅಂತರಂಗದ ಕದವ ತಟ್ಟಿ - ರಚನೆ :ಶ್ರೀ. ಆನಂದ ರಾಮ್, ಶೃಂಗೇರಿ

ಎನ್ನ ಅಂತರಂಗದ ಕದವ ತಟ್ಟಿ ನಾನೆಂಬ ಭಾವವ ಹೊರದೂಡೋ ಗುರುವೇ

ನಿನ್ನ ನಾಮದ ಬಲದಿಂದ ಮನವ ಶುದ್ಧಗೊಳಿಸಿ

ಭವ ಬಂಧನದಿಂದ ಮುಕ್ತ ಗೊಳಿಸೋ ಪ್ರಭುವೇ|

ನಾನೇನು ಮಾಡಿದೆನೋ ಅದೂ ನಿನ್ನ ಪ್ರೇರಣೆಯ ಫಲವೆಂದು ನಂಬಿಹೆನೋ

ಒಳಿತು ಮಾಡುವ ಮಾನವ ನೀಡಿ  ಸಾರ್ಥಕತೆಯ  ಜನುಮವ ನೀಡೋ ದೊರೆಯೇ|

ಎಷ್ಟು ಅರಿತರೂ ಸಾಲದು ನಿನ್ನ ಮಹಿಮೆಯ ಚರಿತವನು ಅದು ಅಕ್ಷಯವೋ

ಅರಿತಿಹೆನೆಂದು ಪಾಮರ ನಾನು ಬೀಗಿದರೆ ಬಲು ಮೂಡನಲ್ಲದೆ ಇನ್ನೇನೋ|

ನೀ ನುಡಿವ ನುಡಿಗಳಲಿ ಅಡಗಿಹ ವೇದಸಾರವ ಅರಿತರೆ ಜನುಮ ಪಾವನವೋ

ನುಡಿದಂತೆ ನಡೆದು ಜೀವನ ತೋರುವ ಮಹಾ ಪುರುಷ ನಿನ್ನ ಸಮಾನರಿಲ್ಲವೋ|

ಧರೆಗಿಳಿದು ಬಂದು ಸಖರಾಯಪುರವೆಂಬ ಪುಣ್ಯ ಭೂಮಿಯ ಪಾವನ ಮಾಡಿದೆಯೋ

ನಿನ್ನ ಅರಸಿ ಬರುವ ಬಕುತರ ಹಸಿವೆ ನೀಗಿ ಬದುಕು ಹಸನ ಮಾಡಿ ಹರಸಿದೆಯೋ|

ಎಷ್ಟು ವರುಷಗಳು ಉರುಳಿತು - ರಚನೆ :ಶ್ರೀ. ಆನಂದ ರಾಮ್, ಶೃಂಗೇರಿ

ಎಷ್ಟು ವರುಷಗಳು ಉರುಳಿತು ಗುರುವೇ ನಿನ್ನ ಮೆಚ್ಚಿಗೆಯ ಪಡೆಯದೇ ಸೋತೆನೋ

ಎನ್ನ ಬಕುತಿಯಲಿ ಹುರುಳಿಲ್ಲವೆಂದು ನನ್ನ ನೆರಳಿಂದಲೂ ದೂರವಿರುವೆಯಾ ನೀನು|

ಯಾರದೋ ಭಕುತಿಯ ಕಂಡು ನಾನೂ ಭಕುತಿ ಮಾಡಿದೆನೆಂದು ತಿಳಿದೆಯಾ ದೊರೆಯೇ

ಎನ್ನಂತರಾತ್ಮದೊಳು ನೀ ನೆಲೆ ನಿಂತಿಹೆಯೆಂದು ನಂಬಿ ನಿನ್ನ ಬಜಿಸುವೆನೋ ಗುರುವೇ|

ನೇಮ ನಿಷ್ಠೆಯೊಳು ಎನಗೆ ಮನವಿಲ್ಲ ನಿನ್ನ ನಾಮದ ಹೊರತು ಬೇರೆ ಬೇಕಿಲ್ಲ

ನಿನ್ನ ಚರಿತೆಯೊಳು ನಿಲ್ಲಿಸಿಹೆ ಎನ್ನ ಮನವೆಲ್ಲ ಇನ್ನೇನು ಬೇಕೆನೆಗೆ ಎಲ್ಲಾ ನಿನ್ನದಲ್ಲ|

ನಾನೇಕೆ ನಿನ್ನ ನಂಬಿಹೆನೋ ಎನ್ನ ಮನಕೇ ತಿಳಿಯದಾಯಿತಲ್ಲ ಪ್ರಭುವೇ

ಇದೂ ನಿನ್ನ ಲೀಲೆಯ ಒಂದು ಪರಿಯಲ್ಲದೆ ಮತ್ತೇನು ಹೇಳೋ ಗುರುವೇ|

ನಿನ್ನೊಳು ಎನ್ನ ಮನ ಸದಾ ನಿಲ್ಲಿಸಲು ನಾ ಹೇಗೆ ಬಜಿಸಲಿ ಹೇಳೋ ನನ್ನ  ದೊರೆಯ

ಇನ್ಯಾವ ದೇವರನು  ನಾ ಬೇಡೆನು ನೀ ದೂರ ಮಾಡದೇ ಹರಸೋ ನನ್ನ ಗುರುವೇ|

ಏನೂ ಅರಿಯದ ನಾನು - ರಚನೆ :ಶ್ರೀ. ಆನಂದ ರಾಮ್, ಶೃಂಗೇರಿ

ಏನೂ ಅರಿಯದ ನಾನು ಏನು ಬರೆಯಲಿ ಪದಗಳಲಿ ಪ್ರಭುವೇ

ಸಾಲು ಸಾಲು ಪದಗಳ ಜೋಡಿಸಿ ಫಲವಿಲ್ಲ ಎಂದರಿತು ಮೌನಕೆ ಶರಣಾದೆ ಗುರುವೇ|

ಯಾರೂ ಅರಿಯದ ಲೀಲೆ ನೀ ಎನಗೆ ತೋರಿದರೆ ಜಗಕೆ ಸಾರುವೆ ನಾನು

ನನ್ನರಿವಿನ ಜಗದೊಳು ಪೊಳ್ಳು ಭಾವನೆ ತುಂಬಿರಲು ನೀ ಎಲ್ಲಿ ಒಲಿಯುವೆ ಎನಗೆ|

ಏನೂ ಅರಿಯನೆಂದು ಸಾರಿ ಜಗಕೆ ಹೇಳಿದರೂ ಬರೀ ತೋರಿಕೆಯಾಯ್ತು ನನದು

ಮನವು ಬರಿದು ಮಾಡಿ ನೀನೊಬ್ಬನೆಂಬ ಭಾವ ತುಂಬಲಾರದೆ ಸೋತಿಹ ಮನ ನನದು|

ಅನ್ಯರಗೊಡವೆ ಎನಗೆ ಬೇಡವೆಂದು ಮನಕೆ ನೀ ಹೇಳಿದರೂ ಬಿಡಲಿಲ್ಲ ಭ್ರಮೆಯು

ಇತರರ ಅನಂದದಲಿ ದೇವರನು ಕಾಣೆ0ದೆ ನೀನು

ಅದ ಅರಿಯದೇ ಮುಡನಾದೆ ನಾನು| 

ಕಳ್ಳ ಮನದೊಳು ನಂಜಿನಾ ಭಾವತುಂಬಿ ನಿನ್ನ ಭಜಿಸಿ ಫಲವೇನು

ಎಲ್ಲವನೂ ತ್ಯಜಿಸಿ ಪೂರ್ಣ ಶರಣಾಗದೆ ಬೇರೆ ದಾರಿ ತೊರೆಯಾ ನೀನು|

ಅರ್ಥಪೂತಾಂ ಗುರೋರ್ವಾಕ್ಯಂ - ರಚನೆ :ಶ್ರೀಮತಿ. ಶೈಲಜಾ ಕುಮಾರ್, ಮೈಸೂರು

ಅರ್ಥಪೂತಾಂ ಗುರೋರ್ವಾಕ್ಯಂ

ಚಿತ್ತಪೂತಾಂ ಗುರೋರ್ದೃಷ್ಟಿಂ I

ವಚಃ ಪೂತಾಂ ಗುರೋರ್ತತ್ವಂ

ಆತ್ಮಪೂತಂ ಅನುಸರೇತ್ II

ಅರ್ಥಗರ್ಭಿತವಾದ ಪವಿತ್ರವಾದ ಗುರುವಾಕ್ಯವನ್ನು, ನಮ್ಮ ಮನಸ್ಸುಗಳನ್ನು ಪವಿತ್ರವಾಗಿರಿಸುವ ಗುರುದೃಷ್ಟಿಯನ್ನು,ನಮ್ಮ ಮಾತುಗಳನ್ನು ಶುದ್ಧಿಮಾಡುವ ಗುರುತತ್ತ್ವವನ್ನು ಶುದ್ಧಾತ್ಮರಾಗಿ ಅನುಸರಿಸಬೇಕು .

!! ಸರ್ವದಾ ಸದ್ಗುರುನಾಥೋ

ವಿಜಯತೇ!!

೫-೧-೨೦೨೦