ನಾನಲ್ಲ ನಾನಲ್ಲ ಗುರುವೇ ನಿನ್ನ ಬಕುತನು ನಾನಲ್ಲ - ರಚನೆ : ಶ್ರೀ. ಆನಂದ ರಾಮ್, ಶೃಂಗೇರಿ

ನಾನಲ್ಲ ನಾನಲ್ಲ ಗುರುವೇ ನಿನ್ನ ಬಕುತನು ನಾನಲ್ಲ

ಮನವ ಹಿಡಿಯಲಾರದೆ ನಾ ಸೋತು ಶರಣಾದೆನಲ್ಲ|

ಕಾಮ ಕ್ರೋಧವೇ ಮೇಲಾಯಿತಲ್ಲ ಅಲ್ಪ ಸುಖದ ಆಸೆಯೇ ಹೆಚ್ಚಾಯಿತಲ್ಲ

ಮುಸುಕು ಧರಿಸಿ ಬದುಕು ನಡೆಸಿ ಮೈ ಮರೆತು ಹೋದೆನಲ್ಲ ಗುರುವೇ|

ದುರಾಸೆಯ ಬಲೆಯು ಮೈ ಮರೆತ ಮನವ ಸೆಳೆದು ಬೆಂಬಿಡದೆ ಕಾಡಿತಲ್ಲ

ಅನ್ಯರ ಸೊತ್ತು ಪಾಷಾಣವೆಂದರೂ ಮನಸು ಆಸೆಪಟ್ಟು ಬಯಸಿತಲ್ಲ|

ಕಂಡವರ ಸುದ್ದಿ ಮೈಲಿಗೆ ಅಂದರೂ ನಾಲಿಗೆಯು ದೂರ ನಿಲ್ಲದಲ್ಲ

ಶುದ್ದವಿಲ್ಲದ ಮನವ ಹೊತ್ತು ಮಡಿ ಮಡಿ ಎಂದು ಜಪವ ಮಾಡಿದೆನಲ್ಲ|

ಹಸಿದವರಿಗೆ ಅನ್ನ ನೀಡದೆ ತೋರಿಕೆಯ ಧರ್ಮ ಮಾಡಿ ಮೆರೆದೆನಲ್ಲ

ಕೂಡಿಟ್ಟ ಧನವನು ಮನವಿಲ್ಲದೇ ನೀಡಿ ದಾನವೆಂದು ಬೀಗಿದೆನಲ್ಲ|

ಕರ್ಮ ಕಳೆಯದೇ ದೇವ ನೀ ಒಲಿಯದೇ ಎನ್ನ ಬದುಕು ಬದಲಾಗದಲ್ಲ

ಸಖರಾಯಪುರದ ದೇವ ನೀನು ಕರುಣಿಸದೆ ಎನ್ನ ಕೂಗು ನಿಲ್ಲದಲ್ಲl