ಗುರುನಾಥ ಗಾನಾಮೃತ 

ನಾದವಿರದ ಕೊಳಲು ನಾವು 

ರಚನೆ: ಶ್ರೀಮತಿ.ಶೈಲಜಾ ಕುಮಾರ್, ಮೈಸೂರು 

ನಾದವಿರದ ಕೊಳಲು ನಾವು

ನಿಮ್ಮನೇ ನಂಬಿಹ ಕೊರಳು ನಾವು |

ಭಕ್ತಿಸುಧೆ ಹೊಮ್ಮಿಸೋ ಈ ಕೊರಳಲಿ

ಗಾನಾಮೃತ ಹರಿಸೋ ಈ ಕೊಳಲಲಿ ||

ನಿನ್ನ ನಾಮಸ್ಮರಣೆಯಾ ಉಸಿರಲಿ

ನುಡಿಸಿರಿಯಾ ತಾಳದಲಿ |

ಆತ್ಮಾನಂದದ ಭಾವದಲಿ

ಸತ್ಕೀರ್ತನೆಯ ನುಡಿಸಿರಿ ಗುರುದೇವ || ೧ ||

ನಿರ್ಮಲಭಕ್ತಿಯಾ ಅಲೆಯಲಿ

ನಿನ್ನ ಪದಸೇವೆಯಾ ಸ್ತುತಿಯಲಿ |

ಚೈತನ್ಯಪ್ರಭೆಯ ಅನುಭಾವದಲಿ 

ಗಾನಾಮೃತವ ನುಡಿಸಿರಿ ಗುರುದೇವ || ೨ ||

ಆತ್ಮನಿವೇದನೆಯ ರಾಗದಲಿ

ಭಕ್ತಿಭಾವದ ಆಲಾಪದಲಿ |

ನಾದಶುದ್ಧಿಯಾ ಝೇಂಕಾರದಲಿ

ಸತ್ಕೀರ್ತನೆಯಾ ಸದಾ ನುಡಿಸಿರಿ ಗುರುದೇವ ||  ೩ ||