ಇದೆಂತಹ ಬದುಕೋ ಪ್ರಭುವೇ ಬರೀ ಮುಖವಾಡವೆ ಪ್ರಧಾನವು - ರಚನೆ : ಶ್ರೀ. ಆನಂದ ರಾಮ್, ಶೃಂಗೇರಿ

ಇದೆಂತಹ ಬದುಕೋ ಪ್ರಭುವೇ ಬರೀ ಮುಖವಾಡವೆ ಪ್ರಧಾನವು

ಆಡಂಬರ ಬಣ್ಣದ ಚಿತ್ತಾರಕೆ ದೊರೆವುದು ಎಲ್ಲಾ ಮನ್ನಣೆಯೂ|

ನಿನ್ನ ಬಜಿಸುವುದರಲು ಬರೀ ತೋರಿಕೆಯ ಹುನ್ನಾರವು ಇದೆಂತೋ

ನೀ ನುಡಿದುದು ಎಂತೋ ಬಕುತನೆನುತ ನಾ ಮಾಡುವುದು ಇನ್ನೆಂತೋ|

ನಿನ್ನ ನಂಬಿದೆನೆನುತ ನಿನ್ನ ಮಾತನೇ ಮೀರುತ ಬದುಕು ನಡೆಸುವುದೆಂತೋ

ಕರ ಮುಗಿಯುತ ದೇಹ ಬಾಗುತಾ ಸ್ವಾರ್ಥದ ಬೇಡಿಕೆ ಸಲ್ಲಿಸುವುದೆಂತೋ|

ಅನ್ಯರ ವಿಷಯ ವಿಷವೆಂದರೂ ಕೂಡಿ ಆಡುವ ಬಗೆಯು ಅದೆಂತೋ

ಕರ್ಮಮಾಡುತ ನಿನ್ನನೇ ದೂರುತ ಎನ್ನ ಮನ್ನಿಸೆನ್ನುವ ಪರಿ ಅದೆಂತೋ|

ಎಲ್ಲರನೂ ಪ್ರೀತಿಸಿ ಆದರಿಸೆಂದಿರಿ ಮಳ್ಳತನದಿ ನಾ ಮಾಡುವುದು ಇನ್ನೆಂತೋ

ಆರು ಅರಿಗಳ ಗೆದ್ದು  ಈ ಜನುಮ ಸಾರ್ಥಕ ಮಾಡೆಂದಿರಿ ಇಲ್ಲಿ ನಡೆವುದೆಂತೋ|

ನಾನೆಂತೋ ಎನ್ನ ನಡೆಯಂತೋ ನಾನರಿಯೆ ಮುಸುಕು ಸರಿಸೋ ದೊರೆಯೇ

ಸಖರಾಯಪುರದ ಸಂತನು ನೀನು ನಿನ್ನಂಗಳದಿ ನಿಂತು ಬೇಡಿಹೆನು ನನ್ನ ಪ್ರಭುವೇ|