ನನ್ನೊಳಗಿಹ ನಾನು ನಾನೆಂಬ ಭಾವವ ನೀ - ರಚನೆ:ಶ್ರೀ. ಆನಂದ ರಾಮ್, ಶೃಂಗೇರಿ

ನನ್ನೊಳಗಿಹ ನಾನು ನಾನೆಂಬ ಭಾವವ ನೀ ಕಾಣದಾದೆಯಾ ಗುರುವೇ

ಇನ್ಯಾರ ಭಜಿಸಲಿ ನಾನು ಇದ ತ್ಯಜಿಸಿ ಬದುಕಲು ನೀ ಹೇಳೋ ಸಖರಾಯ ಪ್ರಭುವೇ|

ಎಲ್ಲರೊಡಗೂಡಿ ನಿನ್ನ ಸೇವೆಯ ಮಾಡಲು ನಿನ್ನ ಅಂಗಳಕೆ ಬಂದೆನೋ

ನಾನೆಂಬ ಮುಖವಾಡ ಧರಿಸಿ ನಿಜ ಬಕುತನಂತೆ ನಟಿಸಿ ನಿನ್ನೆದುರು ನಿಂತೆನೋ|

ಎಲ್ಲವನೂ ತ್ಯಜಿಸಿದಂತೆ ನಟಿಸಿ ಇಲ್ಲದನು ಹುಡುಕಿ ಮತಿಹೀನನಂತೆ  ಬಾಳಿದೆನೋ

ಎಲ್ಲರ ಸಂಗದಲಿ ನಾನೊಬ್ಬ ಬೇರೆ ಎನುತ ಪೊಳ್ಳು  ಬಕುತಿಯ ತೋರಿ ಬದುಕಿಹೆನೋ|

ನಿನ್ನ ಚರಿತವ ಪಾಡುವ ನಿಜ ಬಕುತರ ಮುಂದೆ ನಾನೊಬ್ಬ ಮಳ್ಳನಂತೆ ನಿಂತಿಹೆನೋ

ಆರು ಅರಿಗಳು ಮನತುಂಬಿ ಕುಳಿತಿರಲು ಶುದ್ದನಂತೆ ತೋರುತ ವಂಚಿಸಿಹೆನೋ|

ತಾಮಸಿಕ ಭಾವಗಳ ನಡುವಿನ ತೊಳಲಾಟದಲಿ ಸೋತು ನಿಂತಿಹೆ ಗುರುವೇ

ಸಾತ್ವಿಕರ ಒಡನಾಟ ಕುಲೀನ ಸಂಗವ ನೀಡಿ ಎನ್ನ ಉದ್ಧರಿಸೋ ಸಖರಾಯ ಪ್ರಭುವೇ|