ಎಲ್ಲಿ ಎಡವಿದೆನೋ ಅರಿಯೆ - ರಚನೆ : ಶ್ರೀ. ಆನಂದ ರಾಮ್, ಶೃಂಗೇರಿ

ಎಲ್ಲಿ ಎಡವಿದೆನೋ ಅರಿಯೆ ಬೆನ್ ತಟ್ಟಿ ಎಬ್ಬಿಸಿ  ಗುರುವು ಎಚ್ಚರಿಸಿದನೋ

ಹುಂಬತನವ ಬಿಡೆನುತ ಕಷ್ಟದಾ ಹಾದಿಯಾದರು ಆಸೆ ಪಡದಿರದೆಂದನೋ|

ಅಂತರಂಗದಲಿ ಹುದುಗಿಹ ಆಸೆಗಳಾ ಗೋಪುರವ ಬುಡಮೇಲು ಮಾಡಿದನೋ

ಎಟುಕುವ ಬದುಕು ನಡೆಸಿ ಗುಟುಕಾದರು ಬೇಸರಿಸದೆ ಮುಂದಡಿ ಇಡೆಂದನೋ|

ತುಂಬಿದಾ ಸಭೆಯೊಳು ಮಾನ ಉಳಿಸಿ ನಿತ್ಯ ಸತ್ಯದರಿವು ನೀಡುವನೋ

ಅನ್ಯರಾ ಬದುಕಿನ ವಿಷಯಾಸಕ್ತಿಗೆ ಮೂಗು ತೂರಿಸದೆ ಸುಮ್ಮನಿರೆಂದನೋ|

ಮನದಂಗಳದಿ ಮೂಡುವ ಕಾಮನೆಗಳಾಟವ ಹತ್ತಿಕ್ಕಿ ಬಕುತಿಯಲಿ ಬೇಡೆಂದನೋ

ಬದುಕು ನಡೆವ ಹಾದಿಯೊಳು ಬರುವ ಬವಣೆಗಳ ಬದಿಗಿಟ್ಟು ಕಾಯ್ವನೆಂದನೋ|

ಹಂಬಲಿಸುವ ನಿಜ ಬಕುತನ ಮನದಾಳದ ಭಕುತಿಯ ಅರಿತು ಹರಸುವನೋ

ಹುಂಬತನದಿ ಮೆರೆವ ಅಲ್ಪಮತಿಯ ಆಡಂಬರದ ಆಟಕೆ ತಾ ಒಲಿಯನೋ|

ಇನ್ನೆಗೆ  ಬಣ್ಣಿಸಲಿ ಸಖರಾಯ ಪುರದ ನನ್ನೊಡೆಯನಾ ಮನದಣಿಯ ಭಜಿಸುವೆನೋ

ಸಾಲಿನಲಿ ತುದಿಯ ಬಕುತನು ನಾನು ನಿನ್ನ ನೋಟಕೆ ಹಂಬಲಿಸಿ ಕಾಯುತಿಹೆನೋ|