ಏನೆಂದು ಕೊಂಡಾಡಲಿ ಗುರುವೇ - ರಚನೆ : ಶ್ರೀ. ಆನಂದ ರಾಮ್, ಶೃಂಗೇರಿ

ಏನೆಂದು ಕೊಂಡಾಡಲಿ ಗುರುವೇ ನಿನ್ನ ಲೀಲೆಯ  ಈ ಮೂಡ ಏನೂ ಅರಿಯ

ಬಕುತರ ಬಾಯಲಿ ಕೇಳುವೆನು ನಿನ್ನ ನಂಬಿದವರ ಸಲಹಿದ ಚರಿತೆಯ|

ಈ ನನ್ನ ಜೀವವು ಕಲ್ಲು ಬಂಡೆಯಂತೆ ನಿನ್ನ ಸೇವಿಸಿದೊಡೆ ತಿದ್ದಿ ತೀಡುವಿಯಂತೆ

ಎನ್ನ ಮನವು ಕಲ್ಲು ಮುಳ್ಳಿನ ನೆಲವು ನಿನ್ನ ನೆನೆದೊಡೆ ಹಸನು ಮಾಡುವಿಯಂತೆ|

ಮನದಿ ತುಂಬಿಹುದು ಮಲಿನ ವಾಸನೆಯು ನಿನ್ನ ನಾಮ ಜಪಿಸೆ ಶುದ್ಧವಾಗುವದಂತೆ

ನೋಡುವ ನೋಟದಲಿಹ ಕಾಮ ಭಾವನೆ ನಿನ್ನ 

ನಾಮ ನುಡಿದೊಡೆ ದೂರಾಗುವುದಂತೆ|

ಅಲ್ಪ ಮತಿಯು ನಾನು ನಿನ್ನ ಸಂಗ ಬಯಸಿ ಸೋತೆನು ಕೂಗಿದೊಡೆ ಬರುವಿಯಂತೆ

ಅವರಿವರ ವಿಷಯ ಮೈಲಿಗೆಯೆಂದರೂ ಅದರಲೇ ಮುಳುಗಿಹ ಎನ್ನ ಎಚ್ಚರಿಸುವಿಯಂತೆ|

ತಂದೆ ನೀನೆಂದು ನಿನ್ನನೇ ನಂಬಿಹೆನು ನಿನ್ನಂಗಳದಿ ಮೊರೆಯಿಡುತಿಹೆನು ಎಲ್ಲಿರುವೆ ಕಾಣದಂತೆ

ಸಖರಾಯಪುರದ  ದಿವ್ಯ ದೇವನು ನೀನು ಮುನಿಸು

ತೋರದೆ ದರುಶನ ನೀಡಿ ಹರಸೋ ತಂದೆ|