ಮೌನದಲಿ ಮಾತು ಭಾವಗಳೆಲ್ಲ ಲೀನವಾಗೋ - ರಚನೆ :ಶ್ರೀ ಆನಂದ ರಾಮ್, ಶೃಂಗೇರಿ

ಮೌನದಲಿ ಮಾತು ಭಾವಗಳೆಲ್ಲ ಲೀನವಾಗೋ ನಿನ್ನ ಮಾತ ನಿಜ ಮಾಡೋ ಗುರುವೇ

ಅರಿವಿಲ್ಲದೇ ನಾನು ನನ್ನ ಮರೆತು ನಿನ್ನ ಸೇರಿದ ಅನುಭವ ನೀಡೋ ದೊರೆಯೇ|

ನಾನೆಂಬ ಬಾವದೊಳು ಮನ ಕಳೆದಿಹುದು ಇದು ಮಿಥ್ಯವೆಂಬ ಅರಿವ ನೀಡೋ ಪ್ರಭುವೇ

ಮಾತಿಲ್ಲದೆ ಮೌನವಾಗಿ ನಿನಗೆ ಶರಣಾಗುವೆ ಶುದ್ಧ ಭಾವವ ಕರುಣಿಸೋ  ದೊರೆಯೇ|

ಅಂತರಾಳದಲಿ ಮೂಡಿಹ ಭಾವ ಕಣ್ಣ ಹನಿಯಾಗಿ ಹರಿದು ನಿನ್ನಲೇ ಸೇರಲಿ

ಭಾವವು ಬರೀ ಮಾತಾಗದೆ ಮೌನದಲಿ ಶರಣಾಗಿ ಸದಾ ನಿನ್ನಲೇ ಲೀನವಾಗಿರಲಿ|

ಮೌನದಲಿ ನಿನ್ನ ಸ್ಮರಿಸುವ ಮನವಿತ್ತು ಎನಗೆ ಮಾತುಗಳ ಸಂಗ ಬೇಡ ಗುರುವೇ

ಹೃದಯದಲಿ ನಿನ್ನ ಕೂರಿಸಿ ಮೌನದಲಿ ಮೆರವಣಿಗೆ ಮಾಡಿ ನಿನ್ನನೇ ಭಜಿಸುವೆ|

ತೋರಿಕೆಯ ಬಕುತಿಮಾಡದೆ ಶುದ್ಧ ಮನದಲಿ ನಿನ್ನ ಬೇಡುತಲಿ ಮೌನದಲಿ ಸ್ತುತಿಸುವೆ

ಶಬ್ದ ಬ್ರಹ್ಮನ ಅರಿವು ನೀಡಿ ಅಲ್ಲ ಸಲ್ಲದ ಪದಗಳ ನುಡಿಸದೆ ಕಾಯೆಂದು ಮೌನದಲಿ ಬೇಡುವೆ|