ಮನತುಂಬಿ ಹಾಡಿದಂತೆ ನಟಿಸುತ - ರಚನೆ :ಶ್ರೀ. ಆನಂದ ರಾಮ್, ಶೃಂಗೇರಿ

ಮನತುಂಬಿ ಹಾಡಿದಂತೆ ನಟಿಸುತ ಮಲಿನ ಭಾವದಿ ನಿನ್ನ ಬೇಡಿ ಫಲವುಂಟೇನು

ಓಡುತಿಹ ಆಸೆಗಳ ಬೆನ್ನತ್ತಿ ಭಜಿಸಿ ಕರುಣಿಸೆಂದರೆ  ಗುರು ಒಪ್ಪುವನೇನು|

ಯಾರೂ ತೋರದ ಭಕುತಿ ನಾ ತೋರುವನೆಂಬ ಆತುರದಿ  ಮುಗ್ಗರಿಸಿ ಬಿದ್ದೆನೇನೋ

ಮರುಳ ಮಾತಿನ ಪದವನು ಜೋಡಿಸುತ  ಶುದ್ಧ ಬಕುತಿಗೆ ವಂಚಿಸಿ ಸೋತು ಹೋದೆನೇನೋ|

ನೀ ಕರುಣಿಸೆಂದು ಬೇಡುತ ಮನಸಿನ ದುರಾಸೆ ಮರೆಮಾಚದೆ ನೀ ಹರುಸುವಿಯೇನು

ಅನ್ಯರ ಹಿತ ಕಾಯದೆ ಸ್ವಾರ್ಥದಲಿ ಬದುಕು ನಡೆಸಿರೆ ನೀ ನನ್ನ ಒಪ್ಪುವಿಯೇನು|

ನೀ ನುಡಿವಂತೆ ನಿನ್ನ ಕರುಣೆಗಾಗಿ ಹಂಬಲಿಸುವ ಬಕುತರ ಕೂಗಿನ ಮುಂದೆ ನಾನಿಲ್ಲವೇನೋ

ಬರೀ ತೋರಿಕೆಯ ಅರಿಕೆಗೆ ನೀ ಒಲಿಯಲಾರೆಂಬ ಅರಿವು  ನನ್ನ ಮನ ಅರಿಯದಾಯಿತೇನೊ|

ಎನ್ನ ಬದುಕನು ಬದಲಿಸಿ ನಿನ್ನಲೇ ನೆಲೆಯಿರಿಸಿ ನೀ ಕಾಯಬಾರದೇನೋ

ಇನ್ನೆಷ್ಟು ಬೇಡಲಿ  ಗುರುವೇ  ದಾರಿ ತೋರಿ ಪಾಮರನ ಹರಸಬಾರದೇನೋ|