ನಿನ್ನ ಕಾಣಲು ಓಡೋಡಿ ಬಂದೆನೋ ಗುರುವೇ - ರಚನೆ :ಶ್ರೀ. ಆನಂದ ರಾಮ್, ಶೃಂಗೇರಿ

ನಿನ್ನ ಕಾಣಲು ಓಡೋಡಿ ಬಂದೆನೋ ಗುರುವೇ ಕದವೇಕೆ ತೆರೆಯಲಿಲ್ಲ

ಮನದ ತುಂಬಾ ಬಯಕೆಯೇ ತುಂಬಿ ನಿನ್ನ ಕಾಣಲು ಒಳಗಣ್ಣ ತೆರೆಯಲಿಲ್ಲ|

ಅದೇಕೋ ಮಾತು ಅತಿಯಾಗಿ ಮೌನಬಿನ್ನಹ ಮರೆಯಾಗಿ ಸೋತೆನೋ

ಮರೆಯಲಿ ನಿಲ್ಲಲಾರದೆ ತೋರಿಕೆಯ ಹಂಬಲ ಹೆಚ್ಚಾಗಿ ನಿನ್ನಿಂದ ದೂರಾದೆನೋ|

ಆರು ಅರಿಗಳ ಸಂಗವ ಬಿಡದೆ ಮೂರ್ಖನಾಗಿ ವ್ಯರ್ಥವಾಗಿ ನಿನ್ನ ಕೂಗಿಹೆನೋ

ಅಸೂಯೆ ಅಹಂಕಾರಗಳ ಒಡನಾಟದ ಫಲವಾಗಿ ನಿನ್ನ ಪಡೆಯದಾದೆನೋ|

ಹೊನ್ನು ಮಣ್ಣಿನ ಸಂಗ ಮಿತಿ ಮೀರದೆ ಬದುಕು ಮಿತವಾಗಿ ನಡೆಸೆಂದೆ ನೀನು 

ಇಡೀ ಬದುಕೇ ಅದೆಂಬ ಭ್ರಮೆಯ ಬಲೆಯೊಳು ಸಿಲುಕಿ ಬಲು ಮೂಡನಾದೆನೋ|

ನಿನ್ನ ಸೇರುವ ಪರಿ ನಿನ್ನ ಅರಿಯುವ ಪರಿ ಎನ್ನ ಮನಕೆ ತಿಳಿಯದಾಗಿದೆ ಗುರುವೇ

ಇನ್ನು ತಡಮಾಡದೆ ಒಮ್ಮೆಯಾದರೂ ದರುಶನ ನೀಡಿ ಹರಸೋ ಪ್ರಭುವೇ|