ಮೌನವಾಗಿರದ ಮನವು ನಿನ್ನ ನಾಮ - ರಚನೆ :ಶ್ರೀ. ಆನಂದ ರಾಮ್, ಶೃಂಗೇರಿ

ಮೌನವಾಗಿರದ ಮನವು ನಿನ್ನ ನಾಮ ಜಪಿಸದಲೇ ಕೊರಗಿಹುದು

ಮಾಡಿದ ಕರ್ಮಗಳ ನೆನೆ ನೆನೆದು ಎನ್ನ ಹೃದಯ ಭಾರವಾಗಿಹುದು ಗುರುವೇ|

ಬೆಳಕ ಕಾಣುವ ಹಂಬಲದಿ ಕತ್ತಲೆಯೊಳು ನಿನ್ನ ನುಡಿ ಕೇಳಲು ಕಾದಿಹೆನೋ

ಸರಿ ತಪ್ಪುಗಳ ಜಂಜಾಟದಲಿ ತಪ್ಪನೇ ಸರಿಯೆಂದು ಭ್ರಮಿಸಿ ಸೋತಿಹೆನೋ|

ಇನ್ಯಾರದೋ ಬಕುತಿಯನು ಮೀರಿಸುವ ಬರದಿ ತೋರಿಕೆಯ ಭಕುತಿ ತೋರಿದೆನೋ

ಹುಂಬ ತನದಿ ನಟಿಸಿ ನಿನ್ನ ಕರುಣೆಯ ಮಾತು ಕೇಳದೇ ಸಮಯ ಕಳೆದೆನೋ|

ನಿನ್ನ ಒಂದು ನೋಟಕೆ ಹಂಬಲಿಸಿ ಹುಂಬನಾಗಿ ನಿನ್ನ ಬೇಡುವುದೇ ಮರೆತೆನೋ

ಸೇವೆ ಮಾಡದೆಲೆ ಎನ್ನ ಕರುಣಿಸೆನ್ನಲು  ನನಗ್ಯಾವ ಬಲವಿದೆ ಅರಿಯೆನೋ|

ಪರಿಪೂರ್ಣ ಮಾಡೆನ್ನ ಬದುಕು ಬರಡಾಗಿ ಹೋಗದಿರಲಿ ಹರಸೆನ್ನನು

ಸಖರಾಯಧೀಶ ನೀನೇ ನನ್ನ ಪ್ರಭುವು ತೆರೆಯೋ ನನ್ನ ಒಳಗಣ್ಣನು |