ಗುರುನಾಥ ಗಾನಾಮೃತ 

ದಟ್ಟಿಯ ಸುತ್ತಿಕೊಂಡವನಂತೆ

ರಚನೆ: ಅಂಬಾಸುತ 

ದಟ್ಟಿಯ ಸುತ್ತಿಕೊಂಡವನಂತೆ

ದಿಟ್ಟನಿವ ಗಡ್ಡಾಧಾರಿಯಂತೆ

ನಗುತಲೇ ನರರಾ ಉದ್ಧರಿಸುವವನಂತೆ

ಸಖರಾಯಪಟ್ಟಣದ ಅವಧೂತನಿವನಂತೆ||

ಧರ್ಮದ ಹಾದಿ ತೋರುವನಂತೆ

ಅಧರ್ಮಿಗೆ ಬಲು ಘೋರನಿವನಂತೆ

ಆಡುಮಾತಿನಲ್ಲೇ ಮಂತ್ರಾರ್ಥ ಪೇಳ್ವನಂತೆ

ಸಖರಾಯಪಟ್ಟಣದ ಅವಧೂತನಿವನಂತೆ ||

ಬಂಜೆಯರ ಮಡಿಲೊಳು ಮಗುವಾದವನಂತೆ

ದಿಕ್ಕೆಟ್ಟ ಮಕ್ಕಳಾ ತಾಯ್ತಂದೆ ಇವನಂತೆ

ಗುರುಮನೆಯ ತವರು ಮನೆಯಾಗಿಸಿದವನಂತೆ

ಸಖರಾಯಪಟ್ಟಣದ ಅವಧೂತನಿವನಂತೆ ||

ಆಶ್ರಮದಾ ಶ್ರಮ ಬೇಡ ಎಂದವನಂತೆ

ಹೆತ್ತವರಾ ಹಿರಿತನವಾ ಸಾರಿ ನಿಂತವನಂತೆ

ವಿತ್ತದಾಸೆಯ ಅಳಿಸಿ ಚಿತ್ತದೊಳಿಹನಂತೆ

ಸಖರಾಯಪಟ್ಟಣದ ಅವಧೂತನಿವನಂತೆ ||

ದೇಹಭಾವವ ಅಳಿಸಿ ಆತ್ಮತೋರಿದನಂತೆ

ಪರಮಹಂಸರ ಪಾದ ಸೇವಿಸಿರೆಂದವನಂತೆ

ಪರತರ ಪರಬ್ರಹ್ಮ ಗುರು ಎಂದವನಂತೆ

ಸಖರಾಯಪಟ್ಟಣದ ಅವಧೂತನಿವನಂತೆ ||

ಕಟ್ಟುಪಾಡುಗಳಾ ಮೀರಿದವನಂತೆ

ಗೀತೆ ಬೋಧಿಸಿದಾ ಕೃಷ್ಣ ಇವನಂತೆ

ಭಕುತರ ಮನಸಂಚಾರಿಯೂ ಅಂತೆ

ಸಖರಾಯಪಟ್ಟಣದ ಅವಧೂತನಿವನಂತೆ ||

ಕರ್ಮದ ಹಿಂದಿನ ಮರ್ಮ ತಿಳಿಸಿದವನಂತೆ

ಕಣ್ಣಲ್ಲೇ ಕಾರುಣ್ಯ ತುಂಬಿಕೊಂಡವನಂತೆ

ಅಷ್ಟಸಿದ್ದಿಗಳಾ ಬಲಹೊಂದಿರುವವನಂತೆ

ಸಖರಾಯಪಟ್ಟಣದ ಅವಧೂತನಿವನಂತೆ ||

ಆದ್ಯಂತರಹಿತ ಪರಿಪೂರ್ಣನಿವನಂತೆ

ಆನಂದರೂಪಿ ಅಪ್ರಮೇಯನಂತೆ

ಅಂಬಾಸುತನಾ ಸದ್ಗುರು ಇವನಂತೆ

ಸಖರಾಯಪಟ್ಟಣದ ಅವಧೂತನಿವನಂತೆ ||