ನಿನ್ನ ಕಾಣಲು ಓಡಿ ಬಂದೆನೋ ಗುರುವೆ - ರಚನೆ :ಶ್ರೀ. ಆನಂದ ರಾಮ್, ಶೃಂಗೇರಿ

ನಿನ್ನ ಕಾಣಲು ಓಡಿ ಬಂದೆನೋ ನಿನ್ನ ದರುಷನಕೆ ಕಾದಿಹೆನೋ

ಎಲ್ಲೂ ಕಾಣದೆ ಏನೂ ಅರಿಯದೆ ನಿನಗಾಗಿ ಹಂಬಲಿಸಿ ಸೋತೆನೋ ಗುರುವೇ|

ನಾನೆಂಬ ಭಾವವ ಕಳಚದ ಹೊರತು ನೀ ದೊರೆಯಲಾರೆ ಎಂಬುದಾ ಬಲ್ಲೆನೋ

ಹಾತೊರೆಯುವ ಮನವನಿತ್ತು  ದೂರನಿಂತು ನನ್ನ ಗುರುನಾಥ ನೋಡುತಿಹನೋ|

ಗುರುವೆಂದು ನಿನ್ನ ನಂಬಿ ಗುರುಬಕುತರ ಒಡನಾಟ ನಡೆಸಿಹೆನೋ

ಭಾವಚಿತ್ರದಲಿ ನಿನ್ನ ಕಂಡರೂ ಸಾಕೆನುತ ಕಾಣದೇ ಬಸವಳಿದು ಹೋದೆನೋ|

ಅದೆಷ್ಟು ಆಟವೋ ಗುರುವೇ ನಿನ್ನದು ಅರಿಯದೇ ಮೂಡನಾದೆನೋ

ಆ ನಿನ್ನ ಒಂದು ಮುದ್ದು ನೋಟಕೆ ಕಾದು ಕಾದು ನನ್ನನೇ ಮರೆತು ಹೋದೆನೋ|

ಇಲ್ಲಿ ನೀ ಕಾಣದೆ ಹೋದರೂ ನೀ ಎನ್ನ ದೂರ ತಳ್ಳಿದರೂ ಸೋಲಲಾರೆನೋ

ದರುಶನವ ನೀಡಿ ಸಲಹಿ ಹರಸುವವರೆಗೂ ನಿನ್ನ ಪಾದ ಬಿಡಲಾರೆನೋ|