ಗುರುನಾಥ ಗಾನಾಮೃತ 

ಕುಳಿತಿಹರು ಗುರುವರರು ಮರದ ನೆರಳಲಿ ಮಂದ ಹಾಸ ಬೀರುತ ಹರಸುತ

ರಚನೆ: ಆನಂದರಾಮ್, ಶೃಂಗೇರಿ  

ಕುಳಿತಿಹರು ಗುರುವರರು ಮರದ ನೆರಳಲಿ ಮಂದ ಹಾಸ ಬೀರುತ ಹರಸುತ

ಬಂದ ಬಕುತರ ಬವಣೆ ತೀರಿಸುತ ಮಹಾದೇವನೇ ತಾನಾಗಿ ತೋರುತ|

ನೀಡುವ ಅಭಯದೊಳು ಪ್ರೀತಿ ತುಂಬಿ ಮನವ ತುಂಬುವರು

ಜೊತೆ ನಾನಿರುವೆ ಸತ್ಯದ ಹಾದಿಯಲಿ  ನಡೆದು ಬದುಕೆನ್ನುವರು|

ಬಕುತಿಯಲಿ ಆಡಂಬರ ಮಾಡದೆ ನಡೆದರೆ ನಿನ್ನ  ಒಪ್ಪುವರು

ನಾನು ಎಂಬುದ ಮರೆತು ಬಜಿಸುತಿರೆ ನಿನ್ನ ಸಂಗಡ ಗುರು ಇರುವರು|

ನಿನ್ನ ಬಕುತಿಯ ರೀತಿ ತಿಳಿಯಲು  ನಿನ್ನ ಮನ ಹೊಕ್ಕು ನೋಡುವರು

ಕಂಡೂ ಕಾಣದಂತಿದ್ದು ನೀ ಎಡವದಂತೆ ಜೊತೆ ಇದ್ದು ಕಾಯುವರು|

ಎಲ್ಲರಲೂ ನೀ ಗುರು ಕಂಡಾಗ ನಿನ್ನ0ತರಂಗದ ಕದವ ತೆರೆವರು

ನಿನ್ನೆಲ್ಲಾ ಸಾಧನೆ ಅವನದು ಎಂದು ಅರ್ಪಿಸಲು ನಿನ್ನ ಉದ್ದರಿಸುವರು|

ಗುರುನಾಥ ಗಾನಾಮೃತ 

ಎಲ್ಲರೂ ನೋಡಲಿ ಎಂದು ಭಕ್ತಿ ತೋರುವುದಿಲ್ಲಾ ನಾನು

ರಚನೆ: ಆನಂದರಾಮ್, ಶೃಂಗೇರಿ  

ಎಲ್ಲರೂ ನೋಡಲಿ ಎಂದು ಭಕ್ತಿ ತೋರುವುದಿಲ್ಲಾ ನಾನು

ನೀನು ಅರಿತರೆ ಸಾಕು ಗುರುವೇ ಅನ್ಯರ ಗೊಡವೆ ಬೇಡ ಎನ್ನುವೆನು|

ಮೌನದಲಿ ಹೃದಯದಲಿ ಹಂಬಲಿಸುತ  ನಿನ್ನನೇ ಕೂಗುವೆನು

ದಯೆ ತೋರಿ ಹರಸು ಗುರುದೇವ ಬೇಡೆನು ಬೇರೆ ಇನ್ನೇನು|

ಬೇಡುವ ಪರಿಯಲಿ ಬೇರೆ ದಾರಿಯನು ನಾ ಕಾಣದಾದೆನು

ಬಾರವಾದ ಮನಹೊತ್ತು ಎದೆಯಾಳದಿ ಬಯಕೆ ತುಂಬಿ ಬಂದು ನಿಂತಿಹೆನು|

ಎಲ್ಲರನು ಹರಸುವ ನೀನು ಎನ್ನನೇತಕೆ ದೂರ ನಿಲ್ಲಿಸಿ ಮೌನವಾದೆ 

ಭಕುತಿ ತೋರಲು ಬಾರದೇ ಪಾಮರನಂತೆ  ನಿನ್ನ ಪದ ತಳದಿ ನಿಂತಿಹೆನು|

ಲಾಕಿಕದ  ಲೋಕದಲಿ ಆಸೆಮೀರಿ ಬದುಕ ನಡೆಸುವ ಹಾದಿ  ತೋರು

ಎನ್ನ ನಂಬಿರುವ ಜೀವಗಳ ಬಯಕೆ ತೀರಿಸಿ ಎನ್ನನು ಮುಕ್ತ ಮಾಡು|

ಗುರುನಾಥ ಗಾನಾಮೃತ 

ಎಂದು ದಯಮಾಡುವೆಯೋ ಗುರುವೇ 

ರಚನೆ: ಶ್ರೀಮತಿ.ಶೈಲಜಾ ಕುಮಾರ್, ಮೈಸೂರು 

ಎಂದು ದಯಮಾಡುವೆಯೋ ಗುರುವೇ 

ಎಂದು ದಯೆತೋರುವೆಯೋ ||

ನೀನಿಲ್ಲಿ ಬರುವ ದಿನವೇ ಸುದಿನ

ಸ್ಮರಿಸುವೆ ಅದನು ನಾ ಅನುದಿನ |

ನೀ ನೆಡೆದಾಡುವ ನೆಲವೇ ಪಾವನ 

ಆ ಪದಧೂಳಿಯ ಮಾಡುವೆ ನಾ ಜತನ || ೧ ||

ನೀನಾಡುವ ಮಾತೇ ಸುಧಾಸಿಂಚನ 

ನೆನೆಯುತ ಸಂತಸಗೊಂಡಿದೆ ಈ ಮನ |

ನೀನೀಡುವ ಕೈ ತುತ್ತೇ ಚೈತನ್ಯಭಿಕ್ಷೆ

ಅದರಲಿ ತುಂಬಿದೆ ಜೀವನ ರಕ್ಷೆ || ೨ ||

ಗುರುನಾಥ ಗಾನಾಮೃತ 

ನಾದವಿರದ ಕೊಳಲು ನಾವು 

ರಚನೆ: ಶ್ರೀಮತಿ.ಶೈಲಜಾ ಕುಮಾರ್, ಮೈಸೂರು 

ನಾದವಿರದ ಕೊಳಲು ನಾವು

ನಿಮ್ಮನೇ ನಂಬಿಹ ಕೊರಳು ನಾವು |

ಭಕ್ತಿಸುಧೆ ಹೊಮ್ಮಿಸೋ ಈ ಕೊರಳಲಿ

ಗಾನಾಮೃತ ಹರಿಸೋ ಈ ಕೊಳಲಲಿ ||

ನಿನ್ನ ನಾಮಸ್ಮರಣೆಯಾ ಉಸಿರಲಿ

ನುಡಿಸಿರಿಯಾ ತಾಳದಲಿ |

ಆತ್ಮಾನಂದದ ಭಾವದಲಿ

ಸತ್ಕೀರ್ತನೆಯ ನುಡಿಸಿರಿ ಗುರುದೇವ || ೧ ||

ನಿರ್ಮಲಭಕ್ತಿಯಾ ಅಲೆಯಲಿ

ನಿನ್ನ ಪದಸೇವೆಯಾ ಸ್ತುತಿಯಲಿ |

ಚೈತನ್ಯಪ್ರಭೆಯ ಅನುಭಾವದಲಿ 

ಗಾನಾಮೃತವ ನುಡಿಸಿರಿ ಗುರುದೇವ || ೨ ||

ಆತ್ಮನಿವೇದನೆಯ ರಾಗದಲಿ

ಭಕ್ತಿಭಾವದ ಆಲಾಪದಲಿ |

ನಾದಶುದ್ಧಿಯಾ ಝೇಂಕಾರದಲಿ

ಸತ್ಕೀರ್ತನೆಯಾ ಸದಾ ನುಡಿಸಿರಿ ಗುರುದೇವ ||  ೩ ||

ಗುರುನಾಥ ಗಾನಾಮೃತ 

ಗುರುವ ಹೊರಗೆ ಅರಸುವರೇಕಯ್ಯಾ 

ರಚನೆ: ಶ್ರೀಮತಿ.ಶೈಲಜಾ ಕುಮಾರ್, ಮೈಸೂರು 

ಗುರುವ ಹೊರಗೆ ಅರಸುವರೇಕಯ್ಯಾ 

ಸದ್ಗುರುವ ಹೊರಗೆ ಅರಸುವುದೇಕಯ್ಯಾ ||

ಹೃದಯದಲಿ ಗುರುವೇ ಇರುವ

ಅವನೆಲ್ಲ ನೋಡುತಿರುವ |

ಮಾಡುವ ಕರ್ಮಗಳ ತೂಗುತಿರುವ

ಅದರ ಫಲಗಳನಿಲ್ಲೇ ನೀಡುತಿರುವ || ೧ ||

ಮಾತಿನಲ್ಲಿ ಗುರುವೇ ಇರುವ

ಕೈಯ ಹಿಡಿದು ನಡೆಸುತಿರುವ |

ಜ್ಞಾನಾಮೃತವ ಉಣಿಸುತಿರುವ 

ಕಾಲಕಾಲಕೆಲ್ಲ ಒದಗಿಸುತಲಿರುವ || ೨ ||

ಚಿತ್ತದಲಿ ಗುರುವೇ ನೆಲೆಸಿರುವ

ನಾಮಸ್ಮರಣೆಯ ಮಾಡಿಸುತಿರುವ |

ಭಕ್ತಿಗಂಗೆಯಲಿ ಮೀಯಿಸುತಿರುವ 

ಸಾಯುಜ್ಯಪದವಿಯ ತೋರಿಸುತಿರುವ || ೩ ||

ಗುರುನಾಥ ಗಾನಾಮೃತ 

ಎಲ್ಲಾ ಅರಿತಿರುವ ನಿನ್ನನು ನಾ ಬೇಡುವುದೆಂತೋ

ರಚನೆ: ಆನಂದರಾಮ್, ಶೃಂಗೇರಿ  

ಎಲ್ಲಾ ಅರಿತಿರುವ ನಿನ್ನನು ನಾ ಬೇಡುವುದೆಂತೋ

ನಿನ್ನರಿವಿಗೆ ಬಾರದೆ ನಾ ಬದುಕು ನಡೆಸುವುದೆಂತೋ|

ಕಪಟ ತುಂಬಿದ ಮನವಿದು ಹಿಡಿತಕೇ ಬಾರದೆ ಓಡುವುದೋ

ನಿನ್ನ ನೆನೆದಾಗ ಮಾಡಿದ ತಪ್ಪಿನ ಅರಿವಾಗಿ ಮರುಗುವುದೋ|

ಎನ್ನ ಮನ್ನಿಸೆಂದು ಎಷ್ಟು ಸಾರಿ ಕೂಗಿ ಬೇಡುವುದೋ ಅರಿಯಲಾರೆ

ನೀ ಕರುಣದಿ ಮನ್ನಿಸಿದರೂ ಸ್ವಾರ್ಥದ ಬೆನ್ನತ್ತಿ ಓಡದೆ ಇರಲಾರೆ|

ನಿನ್ನ ಅಂಗಳದಲಿ ನಿಂತ ಎನಗೆ ಮೇಲೂ ಕೀಳೆಂಬ ಭಾವವಿಲ್ಲಾ

ಅಂತರಾಳದಲಿ ತುಂಬಿದ ಬೇರೆ ಎಂಬ ಭಾವದಲಿ ನಾ  ಸೋತೆನಲ್ಲಾ|

ನಾನು ಎಂಬುದು ಎನ್ನ ಬಿಡದೆ ಕಾಡಿದೆಯಲ್ಲಾ ಗುರುವೇ

ಎಲ್ಲಾ ನೀನೆಂಬ ಭಾವ ಮನದಿ ತುಂಬಿ ಎನ್ನ ಹರಸು ಗುರುವೇ|

ಗುರುನಾಥ ಗಾನಾಮೃತ 

ಹೊರಟಿಹೆನು ನಾನು ಗಾಣಗಾಪುರವೆಂಬ ಭೂ ಕೈಲಾಸಕೆ 

ರಚನೆ: ಆನಂದರಾಮ್, ಶೃಂಗೇರಿ  

ಹೊರಟಿಹೆನು ನಾನು ಗಾಣಗಾಪುರವೆಂಬ ಭೂ ಕೈಲಾಸಕೆ

ಸಕರಾಯಧೀಶನ  ಅನುಮತಿ ಬೇಡಿ ಮುನ್ನಡೆದಿಹೆನು ಪುಣ್ಯ ಲೋಕಕೆ|

ಇಲ್ಲೇ ಬಾ ಎಂದಿಹನು ಹರಸುವನು ಕಳೆಯುವನು ಕರ್ಮವನು 

ಭವ  ಬಂಧನವ ಕಳೆವನು ಮುಕುತಿಯ ದಾರಿಯ ತೋರುವನು|

ಸುಲಭದಿ ದೊರೆವುದಿಲ್ಲಾ ಗುರುವಿನ ಕರುಣೆಯು ನೀ  ಅರಿಯೊ

ನೀಡಿಹನು ಸಕರಾಯಧೀಶನು ಒಂದವಕಾಶವನು ಮಹಾದೇವನು|

ಬರೀ ಬೇಡುವುದೊಂದೆ ಕಾಯಕವಲ್ಲಾ ನೀಡುತ  ಬದುಕೆಂದನು 

ದಿವ್ಯ ಗುರು ಸನ್ನಿಧಿಯಿದು ಮಲಿನ ಮನವ  ಹಸನು ಮಾಡಿ ಬದುಕೆಂದನು |

ಗುರುನಾಥ ಗಾನಾಮೃತ 

ಎಂದು ಬರುವೆ ಗುರುನಾಥ 

ರಚನೆ: ಶ್ರೀಮತಿ.ಶೈಲಜಾ ಕುಮಾರ್, ಮೈಸೂರು 

ಎಂದು ಬರುವೆ ಗುರುನಾಥ

ನಮ್ಮ ಮನೆಯ ಅಂಗಳದೊಳಗೆ |

ಎಂದು ನೆಲೆಸುವೆ ಗುರುನಾಥ

ನಮ್ಮ ಮನಸಿನ ಗುಡಿಯೊಳಗೆ ||

ಹೊರಗಣ್ಣ ಜ್ಯೋತಿಯಲಿ 

ಒಳಗಣ್ಣ ಕಾಂತಿಯಲಿ

ನೋಡುವೆನೊಮ್ಮೆ ನಿನ್ನ ದಿವ್ಯಮೂರ್ತಿಯ |

ಬಹಿರಂಗದ ಮಾತಿನಲಿ 

ಅಂತರಂಗದ ಮೌನದಲಿ

ಕಾಣುವೆನೊಮ್ಮೆ ನಿನ್ನ ಭವ್ಯಮೂರ್ತಿಯ || ೧ ||

ಸುಂದರ ಸಗುಣ ರೂಪದಲಿ

ನಿರಾಕಾರ ನಿರ್ಗುಣ ಸ್ವರೂಪದಲಿ

ದರ್ಶಿಪನೊಮ್ಮೆ ನಿನ್ನ ತೇಜೋಮೂರ್ತಿಯ |

ಅಂತರ್ಮುಖಿಯ ಸ್ತಬ್ಧತೆಯಲಿ

ಬಹಿರ್ಮುಖಿಯ ಚೇತನದಲಿ

ಕಾಣುವೆನೊಮ್ಮೆ ನನ್ನ ಜೀವದೊಡೆಯನಾ || ೨ ||

ಗುರುನಾಥ ಗಾನಾಮೃತ 

ಬಂದೆನೋ ಬೃಂದಾವನಕೆ ಸಕರಾಯಧೀಶನ ಆಸ್ಥಾನಕೆ 

ರಚನೆ: ಆನಂದರಾಮ್, ಶೃಂಗೇರಿ  

ಬಂದೆನೋ ಬೃಂದಾವನಕೆ  ಸಕರಾಯಧೀಶನ ಆಸ್ಥಾನಕೆ 

ಬಕುತರ ಅನುದಿನ ಸಲಹುವ ಮಹಾದೇವನ ಮನೆಯಂಗಳಕೆ|

ಮನವು ಕಂಡಿತು ಅನುಪಮ ಶಾಂತಿಯ ಅವನ ಸನಿಹ ಬಂದಾಗ

ಮೂಡಿತು ಮನದಿ ಮುದದ ಅನುಭವ  ಬೃಂದಾವನ

ಕಂಡಾಗ| 

ಹೊತ್ತು ಬಂದಾಗ ಬವಣೆಗಳ ಕಂತೆ ನಿರಾಳವಾಯಿತು ಗುರುವ ಕಂಡಾಗ

ಮುಸುಕಿದ  ಮಂಜು ಕರಗಿದಂತೆ ಮನದ ನೋವು ಅಳಿಸಿ ಹೋದಾಗ|

ಮಂತ್ರ ವೇದಗಳ  ಪಠಿಸದೆ ಒಲಿವನು ಗುರುವು ಮನ ಶುದ್ದಿಯಾದಾಗ

ಹರಸುವನು ಗುರುವು ಹೃದಯದಲಿ ಹಂಬಲದ ಭಕ್ತಿ ತೋರಿದಾಗ|

ಎಲ್ಲರೊಳು ಅವನ ಕಂಡಾಗ  ನಾನೆಂಬ ಬಾವ ಕರಗಿ ಹೋದಾಗ

ಅರಿವಿಲ್ಲದೆ ಬಕುತರ ಸಲಹುವನು ಕಷ್ಟ ಬಂದು ಮರುಗಿದಾಗ|

ಗುರುನಾಥ ಗಾನಾಮೃತ 

ಏನೂ ಅರಿಯದಾದೆನೋ ಗುರುವೇ ಏನೂ ತಿಳಿಯದಾದೆನೋ

ರಚನೆ: ಆನಂದರಾಮ್, ಶೃಂಗೇರಿ  

ಏನೂ ಅರಿಯದಾದೆನೋ ಗುರುವೇ ಏನೂ ತಿಳಿಯದಾದೆನೋ

ನಿನ್ನ ಬಜಿಸುವ ಪರಿ ತಿಳಿಯದಾದೆನೋ  ದಾರಿ ತೋರಿ ಹರಸು ಎನ್ನನು|

ಮನವ  ನಿಲ್ಲಿಸಿ ನಿನ್ನ ನೆನೆವ ರೀತಿ ಎನಗೆ ತಿಳಿಯದಾಯಿತೋ

ಕೂಗಿ ಕರೆವ ಬಕುತಿ ತೋರಿ ನಿನ್ನ ಬಜಿಸಲಾರೆನೋ ಗುರುವೇ|

ಆಡಂಬರದ ಬಕುತಿ ತೋರಲಾರೆನೋ ನಿಜ ಬಕುತಿಯ ಅರಿಯಲಾರೆನೋ

ಮಲಿನ ಮನವ ಶುದ್ದಿ ಮಾಡಿ ನಿನ್ನ ಬಜಿಸುವ ಶುದ್ದ ಮನವ ನೀಡಲಾರೆಯಾ|

ಕಾಮ ಮೋಹ ತುಂಬಿ ತನುವು ಮನವು ಹಳಸಿ ಹೋಗಿದೆ

ಕಪಟ ಕುಹುಕ ಬಾವ ತುಂಬಿ ಹೃದಯ ಬಲು ಬಾರವಾಗಿದೆ|

ಮಂದ ಮತಿಯು ನಾನು ಪೊಳ್ಳು ಮಾತುಗಳ ಆಡುತಿಹೆನೋ

ಪಾಮರನು ನಾನು ನಿತ್ಯ ಬದುಕ ಬವಣೆ ಮೀರಿ ನಿಲ್ಲಲಾರೆನೋ|

ಎಲ್ಲರ ಸಲಹುವ ಗುರುವೇ ನಮ್ಮ ಮಹಾದೇವ ನೀನಲ್ಲಾವೇನು|

ಸಕರಾಯಪುರದ ಅರಸನು ನೀನು ಕರುಣಿಸಿ ಹರಸು ಎನ್ನನು|

ಗುರುನಾಥ ಗಾನಾಮೃತ 

ತುಸು ಸಾದಿಸಿದೆ ಎಂಬ ಹಂಬಿನಲಿ ನಿನ್ನ ನೆನೆವುದ ಮರೆತೆ ಗುರುವೇ

ರಚನೆ: ಆನಂದರಾಮ್, ಶೃಂಗೇರಿ  

ತುಸು ಸಾದಿಸಿದೆ ಎಂಬ ಹಂಬಿನಲಿ ನಿನ್ನ ನೆನೆವುದ ಮರೆತೆ ಗುರುವೇ

ಬದುಕಿನ ಹಾದಿಯೊಳು ಬರುವ ಕಂದಕದಲಿ ಬಿದ್ದಾಗ ನಿನ್ನ ನೆನೆದೆ ಗುರುವೇ|

ಆಡುವ ಮಾತಿನೊಳು ಹಿಡಿತವಿಲ್ಲದೆ ಮನ ನೋಯಿಸಿ ಬದುಕಿದೆ

ನೋಡುವ ನೋಟದಲೂ ಕಪಟ ತುಂಬಿ ಮನ ಮಲಿನವಾಗಿ ನಲುಗಿದೆ ಗುರುವೇ|

ಬಕುತಿಯ ಮಾಡದೇ ನಿನ್ನ ಬೇಡಿ ಬರುತಿಹೆನು ಗುರುವೇ

ನಿಸ್ಸಹಾಯಾಕನು ನಾನು ಮೋಹದ ಬಲೆಯೊಳು ಸಿಲುಕಿ ಹೋದೆನು ಗುರುವೇ|

ನಾನು ನಾನೆಂಬ ಬಾವದೊಳು ಶೂನ್ಯ ಸಾದನೆಯು ನನ್ನದು ಗುರುವೇ

ನಿನ್ನ ಅರಿವ ಪಡೆವ ಬರದಲಿ ಇಡುವ ಹೆಜ್ಜೆಯು ಸರಿ ಇಲ್ಲ ಗುರುವೇ|

ನಿತ್ಯ ನಿರಂತರ ನಿನ್ನ ಸೇವಿಸಿ ಬದುಕು ನಡೆಸುವ ಪರಿ ತಿಳಿಸೋ ಗುರುವೇ

ನಿನ್ನ ಹೊರತು ಬೇರೇನೂ ಬೇಡೆ0ಬ ಬಾವವು ನನ್ನಲಿ ತುಂಬು ನೀ ಗುರುವೇ|

ಗುರುನಾಥ ಸ್ತೋತ್ರ  ಕುಸುಮಾಂಜಲಿ 

ದೇಹೋ ದೇವಾಲಯಃ ಪ್ರೋಕ್ತಃ

ಆತ್ಮಾ ತು ದೇವತಾ ಪೂಜ್ಯಃ |

ದೇಹೋ ಪೀಡ್ಯತೇ ರೋಗೇಣ

ಸಃ ದೀಪ್ಯತೇ ಸಾಧನಯಾ ||

ಪಂಚಭೂತಾತ್ಮಕವಾದ ಈ ಶರೀರವೇ ದೇಗುಲ. ಇದರಲ್ಲಿರುವ ದೇವತೆಯೇ ಆತ್ಮ.ದೇಹಕ್ಕೆ ಆಧಿವ್ಯಾಧಿಗಳಿಂದ ಬಾಧಕವಿದ್ದರೆ ಆತ್ಮವು ನಿರಂತರ ಸಾಧನೆಯಿಂದ ಪ್ರಕಾಶಮಾನವಾಗಿ ಬೆಳಗುತ್ತದೆ.

.ರಚನೆ: ಶ್ರೀಮತಿ.ಶೈಲಜಾ ಕುಮಾರ್, ಮೈಸೂರು

ಗುರುನಾಥ ಗಾನಾಮೃತ 

ಗುರುಕರುಣೆಯೇ ಸತ್ಯ 

ರಚನೆ: ಶ್ರೀಮತಿ.ಶೈಲಜಾ ಕುಮಾರ್, ಮೈಸೂರು 

ಗುರುಕರುಣೆಯೇ ಸತ್ಯ 

ಅದನರಿಯುವ ನಿತ್ಯ ।।

ಕಷ್ಟವಿರಲಿ ಸುಖವಿರಲಿ‌

ಪೊರೆವ ಸದಾ ಕಣ್ರೆಪ್ಪೆಯಂತೆ ।

ದಟ್ಟಾಡವಿಯಲಿರಲಿ ಬಟ್ಟ ಬಯಲಲಿರಲಿ

ಸಲಹುವ ಸದಾ ತಾಯಿಯಂತೆ ।। ೧ ।।

ನಮ್ಮೆಲ್ಲಾ ನೋವು ಸಂಕಟಗಳು

ಗುರುವಿಗೆ ಅರಿವುಂಟು ।

ಮನವು ಪಕ್ವವಾದಾಗ ಅವ ಕೊಡುವ

ಫಲದಲಿ ಸುಖವುಂಟು ।। ೨ ।।

ಹೇಳಿಸಿಕೊಳ್ಳದೆ ಕೊಟ್ಟುಬಿಡುವನು

 ನಮಗೆ ಸೌಭಾಗ್ಯವನು ।

ನೋಯಿಸದೆ ಉಣಿಸಿಬಿಡುವನು 

ಮಧುರ ಪೀಯೂಷವನು ।। ೩ ।।

ಅವನ ಅಮೃತ ದೃಷ್ಟಿಯಲಿ

ಮೇಲುಕೀಳೆಂಬ ಭಾವವಿಲ್ಲ ।

ಅವನ ದರ್ಬಾರಿನಲಿ

ಬಡವ ಬಲ್ಲಿದನೆಂಬ ಭೇದವಿಲ್ಲ ।। ೪ ।।

ಗುರುನಾಮಕಿಂತ ಮಿಗಿಲಾದ 

ಅನ್ಯ ತಪವು ಇಲ್ಲ ।

ಗುರುತೋರಿದ ದಾರಿಗಿಂತ 

ಬೇರೆ ದಾರಿಯು ಇಲ್ಲ ।। ೫ ।।

ಗುರುನಾಥ ಗಾನಾಮೃತ 

ಶ್ರೀಪಾದನನು ನೆನೆಯದ ಮನವು ಯಾಕೆ

ರಚನೆ: ಶ್ರೀಮತಿ.ಶೈಲಜಾ ಕುಮಾರ್, ಮೈಸೂರು 

ಶ್ರೀಪಾದನನು ನೆನೆಯದ ಮನವು ಯಾಕೆ

ಗುರುಪಾದವನು ನಮಿಸದ ಜೀವ ಯಾಕೆ ।।

ಇಹದ ಸುಖವನು ಬೇಡುವ ಕೈಗಳೇಕೆ

ದಾನವ ಮಾಡದ ಸಿರಿತನವೇಕೆ ।

ಗುರುಮೂರುತಿಯ ಕಾಣದ ಕಂಗಳು ಯಾಕೆ

ಅವರ ಮಾತನು ಆಲಿಸದ ಕಿವಿಗಳು ಯಾಕೆ ।। ೧ ।।

ಶ್ರೀಚರಣಕೆ ಬಾಗದ ಶಿರವು ಏಕೆ

ಗುರುವನು ಪೊಗಳದ ನಾಲಿಗೆ ಏಕೆ ।

ಶಬ್ದಗಳಲಿ ಅವನ ಕಾಣದ ಪಾಂಡಿತ್ಯವೇಕೆ

ಜೀವದೊಡೆಯನ ಸದಾ ಸ್ಮರಿಸದ ಜನುಮವೇಕೆ ।। ೨ ।।

ಸ್ಥಿರಚಿತ್ತವಿರದ ತಪವು ಯಾಕೆ

ಗಣನೆಯೇ ಮಾಡುವ ಜಪವು ಯಾಕೆ ।

ಆಚಾರವಿಲ್ಲದ ನಾಲಿಗೆ ಏಕೆ

ಸ್ಥಿರಮುಕ್ತಿಸುಖವ ಬೇಡದ ಜೀವನವೇಕೆ ।। ೩ ।।

ಗುರುನಾಥ ಗಾನಾಮೃತ 

ಗಡ್ಡಧಾರಿ  ಇವನು ತುಂಡು ದಟ್ಟವನು  ಉಟ್ಟವನು ಯೋಗಿ ಇವನು

ರಚನೆ: ಆನಂದರಾಮ್, ಶೃಂಗೇರಿ  

ಗಡ್ಡಧಾರಿ  ಇವನು ತುಂಡು ದಟ್ಟವನು  ಉಟ್ಟವನು ಯೋಗಿ ಇವನು

ಶಿವನ ಅವತಾರ ಇವನು ಎಲ್ಲೆಲ್ಲೂ ಇಹನು ಇವನೇ ಸಾಂಬಶಿವನು|

ಇಲ್ಲೇ ಇರುವನೆಂದು ಬಲು ಕಾತುರದಿ ಕಾಣಲು ಬಂದಾಗ ಕಾಣನಿವನು

ಕರ್ಮ ಕಳೆಯದೆ ದರುಶನವೀಯನು ಅವನ  ಅಣತಿ ಇಲ್ಲದೆ  ಸಿಗನಿವನು|

ಪೊಳ್ಳು ಬಕುತಿಗೆ ಎಂದೂ ಒಲಿಯನು ನಿಜ ಬಕುತಿಗೆ ಸುಲಭನಿವನು ।

ಆಡಂಬರವ ಬೇಡನಿವನು ಸಹಜ ಪ್ರೀತಿಗೆ  ಸದಾ  ಒಲಿಯುವನು|

ಮರುಗುವನು ಬಕುತರ ಬವಣೆಗೆ ಸದಾ ಅವರ ಕಾಯ್ವನು

ಶುದ್ದ ಮನದಿ ಬದುಕ ನಡೆಸಿ ಅನ್ಯರ ವಿಚಾರ ಬೇಡವೆಂದನು|

ಸಾಧನೆ ಬಯಸಿ ಬರುವ ಭಕುತಗೆ  ತನ್ನದೆಲ್ಲ ಧಾರೆಎರೆಯಲು ಸಿದ್ದನಿವನು

ಲಾಕಿಕ ಬದುಕಿನ ಬವಣೆ ನೀಗುತ ಜೀವನದ ಅರ್ಥ ತಿಳಿಸಿದನಿವನು|

ಮನ್ನಿಸುವನು ಪಾಮರರನು ಎಚ್ಚರಿಸಿ  ಉದ್ದರಿಸಿ ಹರಸಿ ಕಲಿಸುವನು

ಭವರೋಗ ವೈದ್ಯನಿವನು ಸಕಲ ಜೀವಿಗಳ  ಸಲಹಿ ಹರಸುವನು|

ಗುರುನಾಥ ಗಾನಾಮೃತ 

ನಾನು ಭಜಿಸುವೆ ನನ್ನ ಗುರುದೇವನ ಆನಂದಘನನ ಅವಧೂತನ

ರಚನೆ: ಆನಂದರಾಮ್, ಶೃಂಗೇರಿ  

ನಾನು ಭಜಿಸುವೆ ನನ್ನ ಗುರುದೇವನ ಆನಂದಘನನ ಅವಧೂತನ

ಕಾಲಾತೀತನ ದೇಹಾತೀತನ ಸರ್ವ ದುರಿತ ಪರಿಹಾರಕನ ಗುರುವರನ|

ಪೂಜಿಪ ಪರಿ ಅರಿಯದೆ ಮನ ಹೇಳುವಂತೆ ನಿನ್ನ ಪೂಜಿಸುವೆನು

ಮನದಾಳದ ನೋವುಗಳ ಬದಿಗಿರಿಸಿ ಶುದ್ದ ಮನದಿ ನಿನ್ನ ಬೇಡುವೆನು|

ವಿಧಿಯ ಅದಿಪತಿಯ ಕುಕರ್ಮ ಪರಿಹಾರಕನ ಮನ ತುಂಬಿ ಪಾಡುವೆನು

ಸುಲಭದಲಿ  ಕಷ್ಟಗಳ ಹೊಡೆದೋಡಿಸಿ ಭಕ್ತರ ಕಾಯುವವನ ನೆನೆವೆನು|

ಎಲ್ಲರಾಗುರು ಇವನು ಬೇಧವ ತೋರನು ತನ್ನವರೆಂದು ಸಲಹುವನು

ಮೆಚ್ಚಿದ ಬಕುತರ ಸಲಹಲು ಸಮಯವ ನೋಡದೆ ಅಲ್ಲೇ ದರುಶನ ನೀಡುವನು|

ಭಾವುಕ ಬಕುತರ ಮನದೊಳು ತಾ ನೆಲೆಸಿ ಆನಂದವ ನೀಡುವನು

ನಿಜ ಭಕುತರ ಸಂಗದಿ ತಾ ಇದ್ದು ಮುಕುತಿಯ ದಾರಿಯ ತೋರುವನು|

ಗುರುನಾಥ ಗಾನಾಮೃತ 

ಎಲ್ಲವೂ ಅವನದೆಂದಿರಿ ಕಾಣುವ ಮತ್ತೆಲ್ಲಾ ಮಿಥ್ಯವೆಂದಿರಿ ಗುರುವೇ

ರಚನೆ: ಆನಂದರಾಮ್, ಶೃಂಗೇರಿ  

ಎಲ್ಲವೂ ಅವನದೆಂದಿರಿ ಕಾಣುವ ಮತ್ತೆಲ್ಲಾ ಮಿಥ್ಯವೆಂದಿರಿ ಗುರುವೇ

ನಿಮ್ಮ ನಂಬಲು ಬೇರಾವ ಸತ್ಯದ ಅರಿವಿನಗೊಡವೆ ಎನಗೆ ಬೇಡ ಗುರುವೇ|

ನನ್ನದೆಂಬುದು  ಬರೀ ಭ್ರಮೆಯು ಎರಡೂ ಒಂದಾದಾಗ  ಏನೂ ಇಲ್ಲವೋ

ಗುರುವಾಕ್ಯ ಹೊರತು ಬೇರೇನು ಬೇಡವೋ ಎಮಗೆ ನೀವೇ ಎಲ್ಲವೂ|

ಎಂಟು ಮೆಟ್ಟಿಲ ಏರಿ ಗುರುಕರುಣೆ ತೋರಿದೊಡೆ ಎಲ್ಲಾ ಲೀನವೋ

ಸದ್ಗುರು ದೊರೆತು ಕೈ ಹಿಡಿದು ಅಹಂ ಅಳಿಸಿದೊಡೆ ಅವನಲೇ ಎಲ್ಲವೂ|

ಶುದ್ದ ಮನವೊಂದೆ ಮಹಾದೇವನಿಗೆ ಪ್ರಿಯವೆಂದಿರಿ ಗುರುವೇ

ಎನ್ನ ಮನದ ಮಾತಿನಲಿ ನಿತ್ಯ ನಿನದೇ ಧ್ಯಾನ ತುಂಬಿರಲಿ ಗುರುವೇ|

ಬೇಡುವ ಮನದಾಳದಿ ತುಂಬಿರಲಿ ನಿಸ್ವಾರ್ಥದ  ಬೇಡಿಕೆಗಳು

ಉಸಿರು ಉಸಿರಲೂ ತುಂಬಿರಲಿ ನಿಮ್ಮ ನಾಮವು ಗುರುವೇ|