ಗುರುನಾಥ ಗಾನಾಮೃತ 

ಅರಿವಿನಾಲಯದ ದೊರೆಯೇ ಗುರುವೇ

ರಚನೆ: ಅಂಬಾಸುತ 

ಅರಿವಿನಾಲಯದ ದೊರೆಯೇ ಗುರುವೇ

ಈ ಅಲ್ಪನ ಅಲ್ಪತ್ವಾ ಕಳೆಯೋ ಪ್ರಭುವೇ ||ಪ||

ಬಿಡಿಸೋ ಮೋಹ ಮಾಯಾಜಾಲವಾ

ಹಿಡಿಸೋ ನಿನ್ನಾ ನಾಮ ಸಂಕೀರ್ತನವಾ

ಕೆಡಿಸೋ ಕಾಮಾದಿ ದುರ್ಗುಣಂಗಳಾ

ನೆಡೆಸೋ ಕರಪಿಡಿದೂ ಸರಿದಾರಿಯೊಳಗೆನ್ನಾ ||೧||

ಸಾಕುಸಾಕಾಯ್ತೋ ಈ ಭವಸಂಕಟಾ

ಬೇಕು ಬೇಕಾಯ್ತೋ ನಿನ್ನ ನಿಜದನುಭವಾ

ಅಲ್ಲಿ ಇಲ್ಲಿ ನಿನ್ನ ಹುಡುಕೋ ಗೋಜಿನ್ನೆನಗೇತಕೋ

ಎನ್ನ ಮನಮಂದಿರದೀ ನೀ ಬಂದು ನೆಲೆಸೋ ||೨||

ನಾ ಮಾಡಿದೆ ನಾ ಹೇಳಿದೆ ಎಂಬುವುದಾ

ನೀ ಹೋಗಲಾಡಿಸೋ ಎನ್ನನುದ್ಧರಿಸೋ

ಬೋಧಾಮೃತವಾ ನೀ ಸದಾ ಸುರಿಸೋ

ಅದ ಹೀರಿ ಈ ಆತ್ಮ ಬೆಳೆವಂತೆ ಹರಸೋ ||೩||

ಬಂದದ್ದು ಬರಲೀ ಹೋದದ್ದು ಹೋಗಲೀ

ಭಗವದ್ರೂಪಿ ಗುರು ಸದಾ ಎನ್ನೊಡನಿರಲೀ

ಅವಧೂತಾತ್ಮಕಾ ಶ್ರೀವೇಂಕಟಾಚಲಾ

ಅಂಬಾಸುತ ಹೃತ್ಕಮಲ ನಿವಾಸಾ ||೪||