ಗುರುನಾಥ ಗಾನಾಮೃತ 

ಕಾವಿ ಧರಿಸದ ಸಂನ್ಯಾಸಿಯಿವನಮ್ಮಾ

ರಚನೆ: ಶ್ರೀಮತಿ.ಶೈಲಜಾ ಕುಮಾರ್

ಕಾವಿ ಧರಿಸದ ಸಂನ್ಯಾಸಿಯಿವನಮ್ಮಾ

ಮನಕೇ ಕಾವಿಯುಟ್ಟಿಹನಮ್ಮಾ || ಪ ।।

ಭೋಗಭಾಗ್ಯಗಳ ಆಸೆ ಇವಗಿಲ್ಲ 

ಧನಕನಕಗಳು ಇವಗೆ ಬೇಕಿಲ್ಲ

ಮಹಿಮೆಹಿರಿಮೆಗಳ ಗೊಡವೆಯಿಲ್ಲ

ಮಾನಾಪಮಾನಗಳ ಚಿಂತೆಯೇ ಇಲ್ಲ ।। ೧ ।।

ಸ್ವಾತ್ಮಾನಂದದಿ ಸದಾ ನಲಿವನಮ್ಮಾ

ಭಕ್ತರ ದುಗುಡವ ದೂರ ಮಾಡುವನಮ್ಮಾ

ಧರ್ಮಸ್ಥಾಪನೆಯೇ ಇವನ ಗುರಿಯಮ್ಮಾ

ತಾ ನೆಡೆದು ಪರರಿಗೆ ದಾರಿತೋರುವನಮ್ಮಾ ।। ೨ ।।

ನಮ್ಮೊಳಗಿಹ ಗುರುವ ಅರಿಯಿರೆನುವ

ಮೌನದಿ ಸಾಧನೆ ಮಾಡಿರೆನುವ

ಅಣುವಿನಲೂ ಭಗವಂತನ ಕಾಣಿರೆನುವ

ಭುವಿಗೆ ಬಂದ ಉದ್ದೇಶವನು ಸಫಲಮಾಡಿಕೊಳ್ಳಿರೆನುವ ।। ೩ ।।