ಗುರುನಾಥ ಗಾನಾಮೃತ 

ಏನೆಂದು ಬೇಡಲಯ್ಯಾ ಸದ್ಗುರುನಾಥ

ರಚನೆ: ಶ್ರೀಮತಿ.ಶೈಲಜಾ ಕುಮಾರ್, ಮೈಸೂರು 

ಏನೆಂದು ಬೇಡಲಯ್ಯಾ ಸದ್ಗುರುನಾಥ

ಏನೆಲ್ಲಾ ಬೇಡಲಯ್ಯಾ !

ನನಗರಿಯದೆ ಪೊರೆಯುತಿಹೆ ನೀನು

ನಾ ಬೇಡದೆ ಕೊಡುತಿರುವೆ ನೀನು !

ಯೋಗ್ಯವಾದದೆ ನೀಡುತಿಹೆ ನೀನು 

ಬೇಡಲಿನ್ನೇನು ಉಳಿಸಿಹೆ ನೀನು !! ೧ !!

ನೀ ಜೊತೆಗಿರೆ ಮರೆಯಾಗುವುದು ನೋವು

ನೀ ಒಲಿದರೆ ಬರುವುದು ಗೆಲುವು !

ನಿನ್ನ ಕೃಪೆಯಿರೆ ಕಳೆವುದು ಕರ್ಮ

ನಿನ್ನ ದಯೆಯಿರೆ ಉಳಿವುದು ಧರ್ಮ !! ೨ !!

ಕಷ್ಟದಲಿದ್ದಾಗ ನೀನೇ ಬಂದು ಸಲಹಿದೆ 

ಪ್ರೇಮಾಮೃತವ ಹರಿಸಿ ಉದ್ಧರಿಸಿದೆ !

ಮೇರೆ ಮೀರಿದೆ ಧನ್ಯತೆಯ ಭಾವಸಿಂಚನ

ಪಾದದಿ ಶರಣಾಗತಿಯೊಂದೇ 

ಜನ್ಮಪಾವ‌ನ !! ೩ !!

ಭಕ್ತಿಮಾರ್ಗದಿ ನೆಡೆಸುವೆ ನೀನು

ಜ್ಞಾನದೀವಿಗೆಯ ಹಚ್ಚಿಹೆ ನೀನು !

ಸಮತ್ವಭಾವವ ಕಲಿಸಿಹೆ ನೀನು

ಕೊಡುಗೈ ದಾತಾರನಾಗಿಹೆ ನೀನು !! ೪ !!

ಗುರುನಾಥ ಗಾನಾಮೃತ 

ಜಯ ಜಯ ಸದ್ಗುರು ಶ್ರೀವೇಂಕಟಾಚಲ

ರಚನೆ: ಅಂಬಾಸುತ 

ಜಯ ಜಯ ಸದ್ಗುರು ಶ್ರೀವೇಂಕಟಾಚಲ

ಜಯ ಜಯ ಸದ್ಗುರು ಶ್ರೀವೇಂಕಟಾಚಲ

ಜಯ ಜಯ ಸದ್ಗುರು ಶ್ರೀವೇಂಕಟಾಚಲ

ಜಯ ಜಯ ಸದ್ಗುರು ಶ್ರೀವೇಂಕಟಾಚಲ ||ಪ||

ಸ್ಥಿತಿ ಕಾರಣ ನೀ ಶ್ರೀವೇಂಕಟಾಚಲ

ಸನ್ಮತಿದಾಯಕ ಶ್ರೀವೇಂಕಟಾಚಲ

ಸದ್ಗತಿಪ್ರದಾಯಕ ಶ್ರೀವೇಂಕಟಾಚಲ

ಕ್ಷಿತಿ ಉದ್ಧಾರಕ ಶ್ರೀವೇಂಕಟಾಚಲ ||೧||

ಬೋಧರೂಪಾ ಶ್ರೀವೇಂಕಟಾಚಲ

ಭಾಗ್ಯವಿಧಾತ ಶ್ರೀವೇಂಕಟಾಚಲ

ಅನುಭವ ವೇದ್ಯ ಶ್ರೀವೇಂಕಟಾಚಲ

ಅನಂತ ಮಹಿಮ ಶ್ರೀವೇಂಕಟಾಚಲ ||೨||

ಸ್ವಾತ್ಮಾರಾಮ ಶ್ರೀವೇಂಕಟಾಚಲ

ನಿಜಾನಂದದಾಯಕ ಶ್ರೀವೇಂಕಟಾಚಲ

ಶೋಕನಿವಾರಕ ಶ್ರೀವೇಂಕಟಾಚಲ

ಧರ್ಮ ಮೂರ್ತಿ ಶ್ರೀವೇಂಕಟಾಚಲ ||೩||

ಅಜಹರಿಹರ ನೀ ಶ್ರೀವೇಂಕಟಾಚಲ

ಆನಂದ ರೂಪ ಶ್ರೀವೇಂಕಟಾಚಲ

ಅಗಣಿತ ಗುಣ ಮಹಿಮ ಶ್ರೀವೇಂಕಟಾಚಲ

ಅಕ್ಷರ ಅನಂತ ಶ್ರೀವೇಂಕಟಾಚಲ ||೪||

ಕರುಣಾಸಾಗರ ಶ್ರೀವೇಂಕಟಾಚಲ

ಕಾರುಣ್ಯಮೂರುತಿ ಶ್ರೀವೇಂಕಟಾಚಲ

ಕೃಪಾನಿಧಿ ನೀ ಶ್ರೀವೇಂಕಟಾಚಲ

ಕರ್ಮಫಲಪ್ರದ ಶ್ರೀವೇಂಕಟಾಚಲ ||೫||

ಶಾಂತಸ್ವರೂಪ ಶ್ರೀವೇಂಕಟಾಚಲ

ದುಷ್ಟರಿಗೆ ಉಗ್ರರೂಪ ಶ್ರೀವೇಂಕಟಾಚಲ

ಶಿಷ್ಟಪರಿಪಾಲಕ ಶ್ರೀವೇಂಕಟಾಚಲ

ಶರಣಾಗತ ಪಾಲಕ ಶ್ರೀವೇಂಕಟಾಚಲ ||೬||

ಘನ್ನ ಮಹಿಮ ಶ್ರೀವೇಂಕಟಾಚಲ

ವಾದಿಭಯಂಕರ ಶ್ರೀವೇಂಕಟಾಚಲ

ಕೃಷ್ಣಯೋಗೀಂದ್ರ ಶ್ರೀವೇಂಕಟಾಚಲ

ಶಾರದಾ ತನಯಾ ಶ್ರೀವೇಂಕಟಾಚಲ ||೭||

ಸಖರಾಯಪುರಾಧೀಶ ಶ್ರೀವೇಂಕಟಾಚಲ

ಅಂಬಾಸುತನ ಪ್ರಿಯ ಶ್ರೀವೇಂಕಟಾಚಲ

ಶರಣಂ ಶರಣಂ ಶ್ರೀವೇಂಕಟಾಚಲ

ಶರಣಂ ಶರಣಂ ಶ್ರೀವೇಂಕಟಾಚಲ ||೮||

ಗುರುನಾಥ ಗಾನಾಮೃತ 

ಆರಡಿಯ ಈ ದೇಹ

ರಚನೆ: ಅಂಬಾಸುತ 

ಆರಡಿಯ ಈ ದೇಹ

ಹಿಡಿ ಬೂದಿ ಕೊನೆಗರಿಯೋ

ಇದನು ತಡೆವವರ್ಯಾರಿಲ್ಲ

ಕೊನೆವರೆಗು ಬಂದೂ ||

ಹೆತ್ತವರು ಮುಂದೆ ಹೋಗುವರು

ಸತಿ ಸುತರು ನಿನ್ನ ಹಿಂದೆ

ಸಖರ ಪಾಡೇನೆಂದು ನೀನರಿಯೆಯೋ

ಕೂಡಿಟ್ಟ ಧನಕನಕ 

ಪೆಟ್ಟಿಗೆಯ ಬಿಟ್ಟು ಬಾರದು

ಕಟ್ಟಕಡೆಯಲಿ ನೀ ಒಂಟಿ ಅರಿಯೋ ||

ಹಾಲನ್ನ ತಿಂದ ಬಾಯಿಗೆ

ಹಿಡಿಹರಳು ಅಕ್ಕಿ ಹಾಕೀ

ಕಣ್ಣೀರ ಸುರಿಸೀ ನಿನ್ನ ಕಳಿಸುವರೋ

ಒಪ್ಪತ್ತು ಇಡರೋ

ಒಪ್ಪ ಬೇಗ ಮಾಡಬೇಕೆಂಬರೋ

ಹೆಣವಿದೂ ಕೆಟ್ಟು ನಾರುವುದು ಎನ್ನುವರೋ ||

ಸತ್ಕರ್ಮ ಮಾಡಿದರೇ

ನಾಲ್ಕುಜನ ಸೇರುವರೋ

ದುಷ್ಟ ನೀನಾದರೇ ದುರುಳ ಹೋಗೆನ್ನುವರೋ

ಹನ್ನೆರಡು ದಿನ ಕಳೆಯೇ

ಭಕ್ಷ್ಯ ಪಾಯಸ ಉಂಡು

ನಿನ್ನ ಮರೆವರೊ ನೀನೇ ಮರೆಯಾದೆ ಎನ್ನುವರೋ ||

ಹುಟ್ಟಿ ಬಂದದ್ದಾಗಿದೆ

ನಾಳೆ ಪೋಪುದಿದ್ದೇ ಇದೆ

ಪುಣ್ಯಕಾರ್ಯವ ಮಾಡೋ ಕೈಲಾದ ತೆರದಿ

ಪರಮ ಪಾವನ ನಮ್ಮಾ

ಗುರುನಾಥನಾ ಸ್ಮರಿಸೋ

ಉದ್ಧಾರವಾಗೋ ಮತ್ತೆ ಹುಟ್ಟದಾಂಗೇ ||

ಗುರುನಾಥ ಗಾನಾಮೃತ 

ನೀನೆನಗೆ ರಾಮಾ ಗುರುವೇ

ರಚನೆ: ಅಂಬಾಸುತ 

ನೀನೆನಗೆ ರಾಮಾ ಗುರುವೇ

ನೀನೆನಗೆ ಕೃಷ್ಣಾ ಗುರುವೇ

ನೀನೆನಗೆ ಹರನೂ ಗುರುವೇ

ನೀನೇ ಪರಬ್ರಹ್ಮನೂ ಗುರುವೇ ||ಪ||

ಆದಿ ಅಂತ್ಯ ನೀ ಗುರುವೆ

ಆಗಮ ನಿಗಮದೊಳೂ ನೀನಿರುವೆ

ಆನಂದ ಆಮೋದ ನೀ ಗುರುವೆ

ಅಚಿಂತ್ಯ ಅನಂತ ನೀನಾಗಿರುವೆ ||೧||

ಸ್ಥಿತಿಯೂ ಗತಿಯೂ ನೀ ಗುರುವೆ

ಸಚ್ಚಿದಾನಂದ ನೀನಾಗಿರುವೆ

ಸಂಧರ್ಭ ಸಂಬಂಧ ನೀ ಗುರುವೆ

ಸೂಕ್ಷ್ಮತೆಯೊಳಗೆ ನೀನಡಗಿರುವೆ ||೨||

ಪ್ರಕೃತಿ ಪುರುಷ ನೀ ಗುರುವೆ

ಅಜ್ಞಾನ ಅಳಿಸುವವ ನೀನಾಗಿರುವೆ

ವೇದ ವಿಜ್ಞಾನ ನೀ ಗುರುವೆ

ವಿನಮ್ರತೆಯಾ ನೀ ಕಲಿಸಿರುವೆ ||೩||

ಆತ್ಮವು ದೇಹವು ನೀ ಗುರುವೆ

ಅಂತರಂಗದೊಳು ನೀನಿರುವೆ

ಜೀವ ನಿರ್ಜೀವ ನೀ ಗುರುವೆ

ಸಂಜೀವಿನಿಯಾಗಿ ನೀ ಬರುವೆ ||೪||

ಬೋಧರೂಪನು ನೀ ಗುರುವೆ

ಭಾಗ್ಯ ವಿಧಾತ ನೀನಾಗಿರುವೆ

ಬಾರೋ ಬಾರೋ ಗುರುವೆ

ಎನ್ನರಿವಿನಾ ದೊರೆ ನೀ ಗುರುವೆ ||೫||

ಸಖರಾಯಪುರವಾಸಿ ಗುರುವೇ

ಸದ್ಭಕ್ತ ಪಾಲಕ ಗುರುವೇ

ಅಂಬಾಸುತನಾ ಸದ್ಗುರುವೇ

ಶ್ರೀವೇಂಕಟಾಚಲ ಪ್ರಭುವೇ ||

ಗುರುನಾಥ ಗಾನಾಮೃತ 

ಎನ್ನಾತ್ಮಬಂಧು ಗುರುದೇವ ಗುರುದೇವ

ರಚನೆ: ಅಂಬಾಸುತ 

ಎನ್ನಾತ್ಮಬಂಧು ಗುರುದೇವ ಗುರುದೇವ

ಸನ್ಮತಿಯ ನೀಡುತಾ ಪೋರೆಯುವಾ ಮಹಾದೇವ ||ಪ||

ಸ್ಥಿತಿಯಿಹುದು ನಿನ್ನಿಂದ ಸದ್ಗತಿಯು ನಿನ್ನಿಂದಾ

ಈ ಸ್ತುತಿಯು ನೀನಿತ್ತ ಮತಿಯಿಂದಲೆ

ಅತಿದೀನ ನಾನಾಗೀ ಬೇಡಿಹೆನೊ ತಂದೆ

ನಿನ್ನಡಿಯಲೇ ಆನಂದವಿಹುದೆಂದು ಬಂದೆ||೧||

ಎಷ್ಟು ಜನ್ಮದ ಪುಣ್ಯದ ಫಲವೊ ಅರಿಯೆ

ನಿನ್ನ ನಾಮ ನಾಲಿಗೆಯಲಿ ನಾ ಹೊತ್ತಿರುವೆ

ಅದುವೆ ನಿನ್ನಯ ಕರುಣೆ ನಾನೆಂದು ಮರೆಯೆ

ಕರುಣಾಸಾಗರನೆಂಬಾ ಬಿರುದಿನಾ ದೊರೆಯೆ ||೨||

ಒಡಲಾಳದಾ ಮಾತು ಒಂದೇ ಗುರು ನೀನೆಂದೆ

ಉತ್ತಮೋತ್ತಮ ನಿನ್ನ ಮಹಿಮೆ ಅನುಭವಿಸಿದೆ

ಉತ್ತರೋತ್ತರದ ಚಿಂತೆ ಬಿಟ್ಟು ನಾ ಬಂದೆ

ಹತ್ತಿರಕೆ ಸೆಳೆದೆನ್ನ ನೀ ಮುದ್ದಿಸಿದೆ ||೩||

ಸಖರಾಯಪುರಾಧೀಶ ಶ್ರೀಸದ್ಗುರುನಾಥ

ಶ್ರೀವೇಂಕಟಾಚಲ ನಾಮದಾ ಅವಧೂತ

ಪಾದಸೇವೆಯ ಬಯಸಿ ಬಂದಿಹೆ ನಾ ಅಂಬಾಸುತ

ನಿಜಾನಂದ ನೀಡಯ್ಯ ನಿನ್ನ ಮನದೊಳಗಿರಿಸುತಾ ||೪||

ಗುರುನಾಥ ಸ್ತೋತ್ರ  ಕುಸುಮಾಂಜಲಿ 

ಸುಖೇ ಯೇ ಸ್ಮರಂತಿ ಗುರುಂ

ನಾನುಭವಂತಿ ತೇ ಕಷ್ಟಮ್ |

ಸುಖೇ ಯೇ ವಿಸ್ಮರಂತಿ ತಂ

ನೂನಂ ತೇ ಪತಂತಿ ಕಷ್ಟೇ ||

ಯಾರು ಸುಖದಲ್ಲಿ ಗುರುವನ್ನು ಸ್ಮರಿಸುತ್ತಾನೋ ಅವನು ಕಷ್ಟವನ್ನು ಅನುಭವಿಸುವುದಿಲ್ಲ.ಆದರೆ ಸುಖದಲ್ಲಿ ಯಾರು ಗುರುಸ್ಮರಣೆಯನ್ನು ಮರೆಯುತ್ತಾನೋ ಅವನಿಗೆ ಸಂಕಟದ ಸರಮಾಲೆಯೇ ಬರುತ್ತದೆ‌..

.ರಚನೆ: ಶ್ರೀಮತಿ.ಶೈಲಜಾ ಕುಮಾರ್, ಮೈಸೂರು

ಗುರುನಾಥ ಗಾನಾಮೃತ 

ಏನೆಂದು ಪೂಜಿಸಲಿ ನಾ ನಿನ್ನ ಗುರುನಾಥ

ರಚನೆ: ಶ್ರೀಮತಿ.ಶೈಲಜಾ ಕುಮಾರ್, ಮೈಸೂರು 

ಏನೆಂದು ಪೂಜಿಸಲಿ ನಾ ನಿನ್ನ ಗುರುನಾಥ

ಏನೆಂದು ಭಜಿಸಲಿ ನಾ ನಿನ್ನ ||

ದೇಹವು ನೀನೇ ಪ್ರಾಣವೂ ನೀನೇ

ಮೌನವೂ ನೀನೇ ಮಾತೂ ನೀ‌ನೇ |

ಕಾಣದೆ ನಿನ್ನ ದಣಿದಿಹೆನಯ್ಯಾ 

ಪಾರುಮಾಡೆನ್ನ 

ಕಾರುಣ್ಯಸಿಂಧುವೇ || ೧ ||

ಚಿತ್ತವೂ ನೀನೇ ಚೇತನನೂ ನೀನೇ

ಮತಿಯೂ ನೀನೇ ಗತಿಯೂ ನೀನೇ |

ಅರಿವು ಕಾಣದೇ ಕೊರಗಿಹೆನಯ್ಯಾ

ದಾರಿತೋರೆಯಾ ಮಾರ್ಗಬಂಧುವೇ || ೨ ||

ಕಾಂತಿಯು ನೀನೇ ಶಾಂತಿಯು ನೀ‌ನೇ

ಅಣುವೂ ನೀನೇ ಮಹಿಮನೂ ನೀನೇ !

ದೇಹಭಾವದಿ ಬಳಲಿಹೆನಯ್ಯಾ 

ಆತ್ಮದರ್ಶನವ ಮಾಡಿಸು ನನ್ನಾತ್ಮಬಂಧುವೇ || ೩ ||

ಗುರುನಾಥ ಗಾನಾಮೃತ 

ಘನ್ನ ಮಹಿಮ ಸದ್ಗುರುನಾಥ

ರಚನೆ: ಅಂಬಾಸುತ 

ಘನ್ನ ಮಹಿಮ ಸದ್ಗುರುನಾಥ

ಭಕುತರ ಅವಗುಣಗಳ ಅಳಿಸೆ ಅವತರಿಸಿದವಧೂತ ||ಪ||

ಕಲ್ಲೆದೆಯೊಳು ಹೂವ ಅರಳಿಸುವಾ

ಕಾಮ ಕಾಂಚಾಣಗಳ ವ್ಯಾಮೋಹವಾ ಅಳಿಸುವಾ ||೧||

ಬಿಟ್ಟು ಹಿಡಿದಿಟ್ಟುಕೊಳ್ಳುವಾ ನಮ್ಮಾ

ಮನದಾ ಹುಚ್ಚು ಕುದುರೆಯಾ ಪಳಗಿಸುವ  ||೨||

ಸಜ್ಜನರಾ ಸಂಘವ ನೀಡಿ ಪೊರೆವಾ

ದುರ್ಜನರಾ ತೋರಿ ಹೀಗಿರಬೇಡಿ ಎನುವಾ ||೩||

ನಗುಮೊಗದ ನಾರಸಿಂಹನಿವಾ

ದುಷ್ಟತನವಾ ಕಳೆದು ಶಿಷ್ಟರನ್ನಾಗಿಸುವಾ ||೪||

ಬೋಧರೂಪನಾಗಿ ಬ್ರಹ್ಮನ ತೋರ್ವಾ

ತಾನೇ ಬ್ರಹ್ಮನಾಗಲು ದಾರಿಯ ಪೇಳ್ವಾ ||೫||

ಸಖರಾಯಪುರವಾಸಿ ಸಂತ

ಅಂಬಾಸುತನಾ ಅಂತರಂಗದೊಳಿವ ಬಹು ಶಾಂತ ||೬||

ಗುರುನಾಥ ಗಾನಾಮೃತ 

ಅರಿಯಲಾದೀತೇ ನಿನ್ನ ಅರಿವಿನಾ ದೊರೆಯೇ

ರಚನೆ: ಅಂಬಾಸುತ 

ಅರಿಯಲಾದೀತೇ ನಿನ್ನ ಅರಿವಿನಾ ದೊರೆಯೇ

ಅವಧೂತ ಅಸಾಮಾನ್ಯ ಅಪ್ರಮೇಯಾ ||ಪ||

ಅನಾಥರಾ ನಾಥ ದೀನಬಂಧು ಕೃಪಾಸಿಂಧೋ

ಆದಿ ಅಂತ್ಯ ರಹಿತಾ ನಿಜ ಆತ್ಮಬಂಧೋ ||೧||

ಅಕ್ಷರ ನೀನಂತೇ ಕುಕ್ಷಿಯಾ ಪಾಲಿಸುವನಂತೆ

ಶಿಕ್ಷೆ ನೀಡದ ರಕ್ಷಕನಂತೇ ಅಕ್ಷಿ ನಿನ್ನ ಸಾಧನವಂತೆ ||೨||

ಮಂಗಳಕರ ಮಂದಹಾಸದ ಮಹಾಯೋಗಿ 

ಭಸ್ಮಭೂಷಿತ ಭಾಸ್ಕರನೇತ್ರ ಭಾಗ್ಯದಾ ವಿಧಾತ ||೩||

ಬೋಧರೂಪ ಮಹಾಪ್ರತಾಪ ಪರಮವೈರಾಗಿ

ಸೋಹಂ ಎಂಬುದ ಹೇಳಿಕೊಟ್ಟ ನಿರ್ಮೋಹಿ ||೪||

ಸಖರಾಯಪುರಾಧೀಶಾ ಸದ್ಭಕ್ತ ಪರಿಪಾಲಕ

ಅಂಬಾಸುತನ ಅಂತರಂಗದ ಆನಂದ ಒಡೆಯಾ ||೫||

ಗುರುನಾಥ ಗಾನಾಮೃತ 

ಜ್ಞಾನಮಾರ್ಗದ ಕಾಂತಿಯಲ್ಲಿ

ರಚನೆ: ಶ್ರೀಮತಿ.ಶೈಲಜಾ ಕುಮಾರ್, ಮೈಸೂರು 

ಜ್ಞಾನಮಾರ್ಗದ ಕಾಂತಿಯಲ್ಲಿ

ಅಜ್ಞಾನವೆಂದೂ ಇರದು |

ಆತ್ಮಜ್ಞಾನದ ಪ್ರಕಾಶದಲ್ಲಿ

ಸೂರ್ಯತೇಜಕೂ ಕುಂದು || ೧ ||

ಸದ್ಗುರುವಿನ ವಚನಾಮೃತದಲ್ಲಿ

ಅಡಗಿದೆ ವೇದಗಳ ಸಾರ |

ಅರಿತು ನೆಡೆದರೆ ಈ ದಾರಿಯಲ್ಲಿ

ದಾಟಿಸಬಲ್ಲದು ಭವಸಾಗರ || ೨ ||

ನಾನೆಂಬ ಭಾವ ಅಳಿದು

ಗುರುವೇ ಸಕಲೆಂದು ಬಲಿದು !

ನಾಮಸ್ಮರಣೆಯೇ ಉಸಿರಾಗಿ

ಬದುಕಾಗಲಿ ಸ್ಥಿರವಾಗಿ || ೩ ||

ಭೋಗವೆಲ್ಲವೂ ಕೃತಕ   

 ಅಲಂಕಾರವೆಲ್ಲವೂ ಕ್ಷಣಿಕ |

ಗುರುಪದಪೂಜೆಯೇ ಜೀವಿಕ

ಜೀವನವಾಗಲೀ ಸಾರ್ಥಕ || ೪ ||

ಗುರುನಾಥ ಗಾನಾಮೃತ 

ನಾನೇನ ಮಾಡಲಯ್ಯಾ

ರಚನೆ: ಅಂಬಾಸುತ 

ನಾನೇನ ಮಾಡಲಯ್ಯಾ

ಜ್ಞಾನವಿರದ ಅತಿ ಹೀನ ಮಾನವ ನಾನು ||

ಉದಯದೊಳೇಳಲಿಲ್ಲಾ

ಕಣ್ತೆರೆದು ನಿನ್ನ ನೋಡಲಿಲ್ಲಾ

ನಿತ್ಯ ಅನುಷ್ಠಾನವ ಎನ್ನ ಕರ್ಮ ಎಂದೆನಲ್ಲಾ

ಮರ್ಮವ ತಿಳಿಯದೇ ಮೂಢನಾದೆನಲ್ಲಾ ||

ಹೆತ್ತವರ ಸೇವಿಸಲಿಲ್ಲಾ

ಗುರುಹಿರಿಯರ ಮಾತು ಕೇಳಲಿಲ್ಲಾ

ವಿದ್ಯೆ ನೈವೇದ್ಯವು ಬುದ್ದಿ ಅತಿ ಮಂದವು

ಗೊಡ್ಡು ಎಮ್ಮೆಯಂತಾದೆನಲ್ಲಾ ||

ಪುಸ್ತಕ ಹಿಡಿಯಲಿಲ್ಲಾ

ಮಸ್ತಕದೊಳು ಒಳಿತೆಂಬುದೇ ಇಲ್ಲಾ

ಸತ್ಯಕೆ ಶತ್ರುವಾದೆ ದುರುಳರ ಮಿತ್ರನಾದೆ

ಅಸುರನಂತಾದೆನಲ್ಲಾ ||

ಕಾಮಕಾಂಚಾಣ ಬಯಸಿದೆ

ಕ್ರೋಧದಿ ಕತ್ತಿ ಹಿಡಿದಿಹೆ

ನಿಜಕುಲಕೇ ನಾ ಕಂಟಕನಾದೇ

ಇದಕೆಲ್ಲ ಕಾರಣ ನೀನೆಂದೇ ||

ಪುಟ್ಟಿಸಿದವ ನೀನೂ

ಎನ್ನ ತಪ್ಪಿಗೆ ಕಾರಣವು ನೀನೂ

ಒಪ್ಪವಾಗಿರಿಸದೆ ಹೀಗೇಕೆ ಎನ್ನ ಮಾಡಿದೆ

ಉತ್ತರಿಸೊ ಗುರುನಾಥಾ ||