ಗುರುನಾಥ ಗಾನಾಮೃತ 

ಯಾರೇನೇ ಎಂದರೆನಗೇನು

ರಚನೆ: ಅಂಬಾಸುತ 

ಯಾರೇನೇ ಎಂದರೆನಗೇನು

ಯಮ ಬಂದು ನಿಂತರು ಹೆದರೆನು ನಾನಿನ್ನು ||ಪ||

ಜ್ಞಾನದಾಯಕ ಗುರುವು ಜೊತೆಗಿರೆ

ಭಯನಿವಾರಿಣಿ ದುರ್ಗಿಯೊಡನಿರೆ 

ಆನಂದದಿ ಅವರಿಟ್ಟಂತೆ ನಾನಿರುವೆ||ಅ.ಪ||

ಹೊನ್ನಿನಾಸೆಗೆ ಹೊರಗೆ ಹೋಗಿದ್ದೆ

ಹದಿಹರಯದ ಬಯಕೆಯೊಳಗೆ ನಾ ಬಿದ್ದೆ

ಕದ್ದೆ ಮಣ್ಣನು ಮೆದ್ದೆ ಗುದ್ದನು ತಿಂದೆ ಗದ್ದಿಗೆಯಿಂದ ಬಿದ್ದೆ

ಗುರಿ ಕಾರಣದೆ ಗುರು ಕಾಪಾಡೆಂದು ನಾನೆದ್ದಿರಲು ||೧||

ಆರು ಜನ ರಕ್ಕಸರು ಅರಿವಿರದೇ

ಎನ್ನೊಳಗೆ ಕುಳಿತು ಸಮರವ ಸಾರಿದರು

ಸೋತೆನೆಂದು ಕಾಯೆಯೆಂದು ತಾಯಿ ಎದುರಲಿ ಮೊರೆ ಇಡಲು

ನಗುತ ಬಂದಂಬಿಕೆ ದುಷ್ಟರ ಸೀಳಿ ಎನ್ನ ಪೊರೆದಿರಲು ||೨||

ಗುರು ರೂಪಿಣಿ ಎನ್ನ ಮಹತಾಯಿ

ಹೆತ್ತವಳ ಮಮತೆಯ ನೀಡುವನು ಎನ್ನ ಗುರುದೇವಾ

ಆಕೆಯೊಳಗೆ ಈತನನ್ನು ಈತನೊಳಗೆ ಆಕೆಯನ್ನು

ಕಂಡು ಸುಖಿಸುವ ಪರಮ ಸೌಭಾಗ್ಯ ಎನಗಿರಲು ||೩||

ಸಖರಾಯಪುರದ ಅವಧೂತ

ಹರಿಹರಪುರವಾಸಿನಿ  ದುರ್ಗಾಂಬಿಕೆ

ಅಂಬಾಸುತಗೆ ಗತಿಯು ಇವರೇ ಅಂಬಾಸುತಗೆ ಮತಿಯು ಇವರೇ

ಅಂಬಾಸುತನೆಂಬ ಹೆಸರು ಎಂದೆಂದಿಗೂ ಇವರಿಂದಲೇ ||೪||