ಗುರುನಾಥ ಗಾನಾಮೃತ 

ಮುದ್ದು ಮುಖದ ಗುರುವೆ ಮುದ್ದು ಮಾಡುವೆ ಬಾರೊ

ರಚನೆ: ಅಂಬಾಸುತ 

ಮುದ್ದು ಮುಖದ ಗುರುವೆ ಮುದ್ದು ಮಾಡುವೆ ಬಾರೊ

ಪೆದ್ದುತನವಿದು ಎಂದು ದೂರ ನಿಲ್ಲಲು ಬೇಡವೊ ||ಪ||

ಕ್ಷಣಕಾಲ ನೀ ಮಗುವಾಗಿಯೇ ಕಂಡಿಹೆ

ಎನ್ನ ಮಡಿಲೇರಿ ನೀ ನಗುವಂತಿಹೆ

ನಿನ್ನ ಮುದ್ದು ಪಾದವ ಎನ್ನ ಎದೆಗೊತ್ತಿಹೆ

ಎನ್ನ ಪುಣ್ಯಕೆ ಎಣೆ ಇಲ್ಲ ಎಂದಂತಿದೆ ||೧||

ಧೇನುವಿತ್ತ ನೊರೆಹಾಲ ನಿನಗೆ ಉಣಿಸುವೆ

ಜೋಲಿಯೊಳಗೆ ಹಾಕಿ ನಿನ್ನ ತೂಗಿ ಪಾಡುವೆ

ಯೋಗನಿದ್ರೆಯ ಮಾಡೊ ಕಂದಾ ಎನ್ನುವೆ

ಈ ಯೋಗ ಎನಗಿರಲಿ ಎಂದು ಬೇಡುವೆ ||೨||

ಶಾರದಮ್ಮ ಈ ಪರಿ ಪೇಳಿದಂತಿದೆ

ಗುರು ವೇಂಕಟಾಚಲನ ಆಡಿಸಿದಂತಿದೆ

ಅಂಬಾಸುತಗೆ ಈ ಭಾವ ಮೂಡಿದೆ

ಸಖರಾಯಧೀಶನಾ ಮುದ್ದು ಮುಖ ಕಂಡಿದೆ ||೩||