ಗುರುನಾಥ ಗಾನಾಮೃತ 

ನೀ ಕಾಯಬೇಕೋ ಸಖರಾಯ

ರಚನೆ: ಅಂಬಾಸುತ 

ನೀ ಕಾಯಬೇಕೋ ಸಖರಾಯ

ಎನ್ನ ಸರ್ವಸ್ವವು ನೀನೇ ಸಖರಾಯ ||ಪ||

ಮಾರ್ಗಶಿರ ಮಾಸದಿ ಸಖರಾಯ

ಕೃಷ್ಣ ಪಕ್ಷದ ಸಪ್ತಮಿ ಸಖರಾಯ

ಧರೆಯೊಳವತರಿಸಿದ ಸಖರಾಯ

ಶಿಷ್ಯೋದ್ಧಾರಕೀ ಅವತಾರ ಸಖರಾಯ ||೧||

ಶ್ರೀನಿವಾಸ ಶಾರದಾ ಸುತ ಸಖರಾಯ

ಶ್ರೀಶಂಕರ ರೂಪ ಸಖರಾಯ

ಗುರುಭಕ್ತಿ ಸಾರಿದ ಸಖರಾಯ

ಗುರುತರ ಭಾಗ್ಯ ನೀಡುವನು ಸಖರಾಯ ||೨||

ಪದ್ಮಾವತಿ ಕೈಹಿಡಿದ ಸಖರಾಯ

ಪರಮಹಂಸಾಶ್ರಮ ಮೀರಿದ ಸಖರಾಯ

ಸಂಸಾರದೊಳಗಿದ್ದು ಸಖರಾಯ

ಇಲ್ಲದಂತಿದ್ದನು ಸಖರಾಯ ||೩||

ನಕ್ಕಾಗ ಶ್ರೀರಾಮ ಸಖರಾಯ

ಸಿಟ್ಟಿನೊಳು ನಾರಸಿಂಹ ಸಖರಾಯ

ಪರಮಯೋಗಿಯು ನೀನೇ ಸಖರಾಯ

ಎಮಗೆಲ್ಲ ಪರಮಾತ್ಮ ನೀ ಸಖರಾಯ ||೪||

ಅವಧೂತನಾಗುತ ಸಖರಾಯ

ನಿಜ ಆನಂದ ರೂಪನಾದ ಸಖರಾಯ

ಆಶ್ರಮ ಕಟ್ಟಲಿಲ್ಲ ಸಖರಾಯ

ಆ ಶ್ರಮವೇತಕೆ ಎಂದನು ಸಖರಾಯ ||೫||

ಸ್ತ್ರೀಜನ್ಮ ಶ್ರೇಷ್ಠವೆಂದ ಸಖರಾಯ

ಸತಿಧರ್ಮ ಪಾಲಿಸಿರೆಂದ ಸಖರಾಯ

ಹೆತ್ತವರೇ ಹಿರಿದೈವ ಸಖರಾಯ

ಎಂಬುದ ಸಾರಿ ಸಾರಿ ಹೇಳಿದ ಸಖರಾಯ ||೬||

ಬಂದದ್ದು ಬಂದಂತೆ ಸಖರಾಯ

ಸ್ವೀಕರಿಸಿದರೇ ಸುಖವೆಂದ ಸಖರಾಯ

ಪಾತ್ರಧಾರಿ ನೀನೆಂದ ಸಖರಾಯ

ಸೂತ್ರಧಾರಿ ಶಿವನೆಂದ ಸಖರಾಯ ||೭||

ಮಾತು ಮುತ್ತಾಗಿರಲಿ ಎಂದ ಸಖರಾಯ

ಮನಸು ಕನ್ನಡಿಯಾಗಿರಲೆಂದ ಸಖರಾಯ

ಧರ್ಮಪಾಲನೆ ಮಾಡಿರೆಂದ ಸಖರಾಯ

ಅಧರ್ಮಕೆ ಅರಿಯಾದ ಸಖರಾಯ ||೮||

ಬಿರುದುಗಳ ಬಿಟ್ಟನು ಸಖರಾಯ

ದುಷ್ಟತನ ಸುಟ್ಟನು ಸಖರಾಯ

ಸಾತ್ವಿಕ ರೂಪನು ಸಖರಾಯ

ಸರ್ವಮಂಗಳ ಕಾರಕ ಸಖರಾಯ ||೯||

ನಿನ್ನಂಥ ಗುರುವುಂಟೇ ಸಖರಾಯ

ಸದ್ಭಕ್ತ ಪರಿಪಾಲಕ ಸಖರಾಯ

ಸಾನಿಧ್ಯ ಸುಖ ನೀಡೋ ಸಖರಾಯ

ಸಚ್ಚರಿತ  ನಿಜಸಂತ ಸಖರಾಯ ||೧೦||

ಸ್ಥಿತಿ ಗತಿ ಕಾರಣ ಸಖರಾಯ

ಸ್ತುತಿಸುವೆ ಅನವರತ ಸಖರಾಯ

ಸ್ವಾನಂದ ಸಾಗರ ಸಖರಾಯ

ಆತ್ಮೋದ್ಧಾರಕ ನೀ ಸಖರಾಯ ||೧೧||

ಸತ್ಯಕ್ಕೆ ಸಗುಣ ನೀ ಸಖರಾಯ

ದುಷ್ಟರಿಗೆ ಬಹುಕಷ್ಟ ಸಖರಾಯ

ನಿಜಬೋಧ ರೂಪ ಸಖರಾಯ

ನಿಜ ಸುಖವನ್ನೇ ನೀಡಯ್ಯ ಸಖರಾಯ ||೧೨||

ಆಷಾಡ ಕೃಷ್ಣ ಪಕ್ಷದಿ ಸಖರಾಯ

ಶುಭ ಷಷ್ಠಿಯ ದಿನದೀ ಸಖರಾಯ

ನಿರ್ಗುಣ ರೂಪ ತಾಳಿದ ಸಖರಾಯ

ನಿತ್ಯ ನಿರ್ಮಲಾತ್ಮಕನು ಸಖರಾಯ ||೧೩||

ಸಖರಾಯ ಸಖರಾಯ ಸಖರಾಯ

ಅಂಬಾಸುತನಾ ನಿಜಸಖನು ಸಖರಾಯ

ಶ್ರೀವೇಂಕಟಾಚಲ ಸಖರಾಯ

ಶರಣು ಶರಣಯ್ಯ ಸಖರಾಯ ||೧೪||