ಗುರುನಾಥ ಗಾನಾಮೃತ 

ನೀನಾಡಿಸಿದಂತೇ ನಾನಾಡುವೇ ಗುರುವೇ

ರಚನೆ: ಅಂಬಾಸುತ 

ನೀನಾಡಿಸಿದಂತೇ ನಾನಾಡುವೇ ಗುರುವೇ

ಕುಣಿಯೆಂದರೆ ಕುಣಿವೇ ಹಾಡೆಂದರೆ ಹಾಡುವೇ ||ಪ||

ಮೂಕನಿಗೆ ಮಾತಾನಿತ್ತವನು ನೀನಲ್ಲವೇ

ಹೆಳವನನೂ ಗಿರಿತುದಿಗೊಯ್ದವ ನೀನೇ

ಬಂಜೆಗೆ ಪುತ್ರರತ್ನವ ನೀನಿತ್ತೇ

ನಿನ್ನಿಚ್ಚೆ ನೆಡೆದಿಹುದೀ ಜಗದೊಳು ಪ್ರಭುವೇ ||೧||

ಕುರುಡನಿಗೇ ದೇವದರ್ಶನ ಮಾಡಿಸಿದೇ

ಮೂಢನಿಂದಾ ಮುತ್ತಿನಾ ಮಾತಿನ ಮಳೆಗರಿಸಿದೇ

ಕರವಿಲ್ಲವನಿಂ ಕಾವ್ಯವ ಬರೆಸಿದೇ

ಅಸಾಧ್ಯವಾವುದೋ ನಿನಗಿಲ್ಲಿ ದೊರೆಯೇ ||೨||

ಬೇಡಿದ ಸತಿಗೆ ಸೌಭಾಗ್ಯವನಿತ್ತೇ

ಇರುಳೊಂದರಲೇ ಬಿಲ್ವ ಮರವನೇ ಚಿಗುರಿಸಿದೇ

ಧೇಹಿ ಎಂದವರಿಗೇ ಕಾಮಧೇನು ನೀನಾದೇ

ನೀನಿಜ ಸಾಹುಕಾರನೋ ನಾನಿನ್ನ ಆಳೋ ||೩||

ಎನ್ನದೆಂಬುದೇನಿಲ್ಲ ನಿನ್ನದಹುದಿಹುದೆಲ್ಲಾ

ಈ ಭಾಗ್ಯಗಳೆಲ್ಲಾ ನೀನಿತ್ತ ಭಿಕ್ಷೆಯೋ

ಅರಮನೆಯೋ ಇಲ್ಲಾ ಹುಲ್ಲುಮಾಳಿಗೆಯೋ

ನಿನ್ನ ನಾಮ ಜಪಿಸುತಾ ಆನಂದಿಸುವೆನೋ ||೪||

ಇಟ್ಟರೆ ಉಣುವೇ ನೀ ಕೊಟ್ಟರೆ ಉಡುವೇ

ನಿಲ್ಲೆಂದರೆ ನಿಲ್ಲುವೇ ಕೂಡೆಂದರೆ ಕೂರುವೇ

ಇರು ಎಂದರೆ ಇರುವೇ ಬಾ ಎಂದರೆ ಬರುವೇ

ಬಿಡು ಎಂದರೂ ಬಿಡೆನೋ ನಿನ್ನ ಪಾದ ಗುರುವೇ ||೫||

ಸಖರಾಯಪುರವಾಸಾ ಸದ್ಗುರುನಾಥಾ

ಅಂಬಾಸುತನಿಗೆ ನೀನೇ ಧಾತಾ

ಆಡಿಸೊ ಅಳಿಸೊ ನಗಿಸೊ ಕುಣಿಸೊ

ನೀ ಪೇಳಿದಂತೆ ಕೇಳ್ವೇ ನಾನಿನ್ನ ದಾಸನೋ ||೬||