ಗುರುನಾಥ ಗಾನಾಮೃತ 

ಅನವರತ ನೆನೆಯೋ ಎಮ್ಮ ಅವಧೂತನಾ

ರಚನೆ: ಅಂಬಾಸುತ 

ಅನವರತ ನೆನೆಯೋ ಎಮ್ಮ ಅವಧೂತನಾ

ಅತಿಷಯದಿ ಜಗ ಪೊರೆವಾ ಸದ್ಗುರುನಾಥನಾ ||ಪ||

ಕಲ್ಪನೆಗೆ ಮೀರಿದವನಾ ನಿಜ ಕಾಮಧೇನುವಾ

ಒಳಿತಿನಾ ಕೋರಿಕೆಗಳ ಪೂರೈಸಿ ಸಲಹುವವನಾ

ಬೇಧಭಾವವ ಮಾಡದ ಭಗವಂತನಾ

ಭಾವಿಕರ ಮನದೊಳಗೆ ತಾ ಸದಾ ನಲಿಯುವವನಾ||೧||

ಯೋಗ ಭೋಗವ ಮೀರಿ ತ್ಯಾಗದೊಳಗಿದ್ದವನಾ

ರಾಗದ್ವೇಷದ ರಾಡಿ ತೊಳೆದು ನಿಂತವನಾ

ಭಕ್ತಿ ಬೀಜವ ಭಕುತರಾ ಹೃದಯದಲಿ ಬಿತ್ತವನಾ

ಗುರುತರ ಭಾಗ್ಯವ ನೀಡಿ ಗುರುವಾದವನಾ ||೨||

ಸಖರಾಯಪುರಾಧೀಶಾ ಎಂದೆನಿಸಿಕೊಂಡವನಾ

ಶ್ರೀವೇಂಕಟಾಚಲ ನಾಮಾಂಕಿತನಾ

ಅಂಬಾಸುತನ ಅಂತರಂಗದಾ ದೇವನಾ

ಆದ್ಯಂತರಹಿತಾ ನಿಗಮಾಗಮ ವೇದ್ಯನಾ ||೩||