ಗುರುನಾಥ ಗಾನಾಮೃತ 

ಕರ ಪಿಡಿದು ನೆಡೆಸೆನ್ನಾ ಸದ್ಗುರುರಾಯಾ

ರಚನೆ: ಅಂಬಾಸುತ 

ಕರ ಪಿಡಿದು ನೆಡೆಸೆನ್ನಾ ಸದ್ಗುರುರಾಯಾ

ನಾ ಬಾಲಕನು ನೀನೇ ಎನ್ನ ಪೋಷಕನೋ ||ಪ||

ಭಕ್ತಿ ಮಾರ್ಗದೊಳಿರಿಸೀ ಜ್ಞಾನದೂರನು ಸೇರಿಸೀ

ಕರ್ಮಗಳಿಂ ಎನ್ನ ಮುಕ್ತನಾಗಿಸೋ ತಂದೇ

ನಿನ್ನ ಬಿಟ್ಟರಿನ್ಯಾರೋ ಸ್ಥಿತಿಗತಿಗೇ ದೇವಾ

ಸಲಹುವವರು ಈ ಪಾಮರ ಶಿಶುವಾ ||೧||

ಅರಿತರಿಯದೇ ನಾನು ಮಾಡಿಹೆನು ತಪ್ಪುಗಳಾ

ಕಲಿತು ದುರ್ಜನೊರೊಡನೇ ಕುಬುದ್ದಿಯಿಂದಲೀ

ಮನ್ನಿಸೋ ಮಹನೀಯಾ ನೀನೆನ್ನ ಮಹಾದೇವಾ

ಮರಳಿ ಮರಳೀ ನಿನ್ನ ಪಾದವನ್ನಾಶ್ರಯಿಸುವೇ ||೨||

ನಾನೆಂಬುದಾ ಬಿಡಿಸೋ ನೀನೆಂಬುದಾ ಕಲಿಸೋ

ನಾವಿಕನು ನೀನಯ್ಯಾ ಭವಸಾಗರವ ದಾಟಿಸೋ

ಸಖರಾಯಪುರಾಧೀಶಾ ಹೇ ಅವಧೂತಾ

ಅಂಬಾಸುತನ ಈ ಮೊರೆ ಕೇಳೋ ಗುರುನಾಥಾ ||೩||