ಗುರುನಾಥ ಗಾನಾಮೃತ 

ಯಾರಿಹರೈ ಈ ಪ್ರಭುವಿನಂತವರು

ರಚನೆ: ಅಂಬಾಸುತ 

ಯಾರಿಹರೈ ಈ ಪ್ರಭುವಿನಂತವರು

ಯಾರಿಹರೈ ಎನ್ನ ಗುರುವಿನಂಥವರು ||ಪ||

ತ್ರಿಜಗವಂದಿತರು ತ್ರಿಗುಣಾತೀತರು

ತ್ರಿಮೂರ್ತಿರೂಪರು ತ್ರಿಭುವನ ಪಾಲಕರು ||ಅ.ಪ||

ನೋಟದಲೇ ಮನ ಕಲ್ಮಷ ಕಳೆವರು

ನಾಟುವ ಮಾತನ್ನಾಡುವಂಥವರು

ನಾಟಕೀಯತೆಯ ನಡೆ ನಡೆ ಎನ್ನುವವರು

ದಿಟ್ಟ ಮೂರುತಿಯಾಗಿ ಕಂಡಂಥವರು ||೧||

ನಾಲ್ಕಾಶ್ರಮವಾ ಮೀರಿದಂಥವರು

ನಾಕವ ಇಳೆಯಲೇ ತೋರಿದಂಥವರು

ನಾಡಿ ಹಿಡಿಯದೆ ಭವ ರೋಗ ಕಳೆವವರು

ನೋಯಿಸದಾ ಹಾಗೆ ನನ್ನತನ ಕಿತ್ತವರು ||೨||

ನಕ್ಕಾಗ ಹರಿಯಂತೆ ಕಂಡವರು

ಸಿಟ್ಟುಗೊಂಡಾಗ ನರಹರಿ ಇವರು

ಗಟ್ಟಿಯಾಗಿ ಬಿಡದೆ ಪಾದವ ಹಿಡಿಯೇ

ಜಗದಾ ಗುಟ್ಟನು ಬಿಚ್ಚಿಡುವವರು ||೩||

ಸಖರಾಯಪುರದೊಳು ಸಖನಾಗಿರುವರು

ಆತ್ಮಸುಖವೀಯೇ ಕಾದಿರುವವರು

ಅಂಬಾಸುತನ ತಾಯಂತೆ ಕಾದಿರುವವರು

ಜಗದಂಬೆ ಪಾದವ ತೋರುವಂಥವರು ||೪||