ಗುರುನಾಥ ಗಾನಾಮೃತ 

ಅಚಲ ಭಕ್ತಿಯ ನೀಡೋ ಶ್ರೀವೇಂಕಟಾಚಲ

ರಚನೆ: ಅಂಬಾಸುತ 

ಅಚಲ ಭಕ್ತಿಯ ನೀಡೋ ಶ್ರೀವೇಂಕಟಾಚಲ

ವಿಚಲಿತಗೊಳ್ಳದೆ ನಿನ್ನದೆ ಸದಾ ಭಜಿಪೆ ||ಪ||

ಚಾರುಮತಿಯ ಬೇಡಿ ವಿಚಾರ ನಾ ಮಾಡಿ

ಆಚಾರ ಬಿಟ್ಟು ಸದ್ಗುರುಚರಣ ತೊರೆಯದಂಥ ||೧||

ಕರ್ಮಕ್ಕೆ ಕಟ್ಟುಬಿದ್ದು ಸ್ವಧರ್ಮ ಕಟ್ಟಿಟ್ಟು

ದುಷ್ಕರ್ಮ ಮಾಡಿ ನಿಜ ಅರಿವನ್ನೇ ಬಿಡದಂಥ ||೨||

ಕೇಳಿದ್ದು ಕಂಡಿದ್ದು ಮಾಡಿದ್ದು ಮುಟ್ಟಿದ್ದು

ಎಂಬ ಗೊಂದಲದಿಂದ ಗುರು ಮರೆಯದಂಥಾ ||೩||

ಮುಕ್ತಿ ಬಯಸಿ ಮುಕ್ತತನವಾ ಬಯಲಲ್ಲಿರಿಸಿ

ಶಕ್ತಿವಂತ ತಾನೆಂದೂ ಗುರುವ ದೂಡದಂಥಾ ||೪||

ಸಖರಾಯಪುರವಾಸಿ ಸದ್ಗುರುನಾಥನೇ

ಅಂಬಾಸುತನ ಅಂತರಂಗದ ಹಿರಿ ದೊರೆಯೇ ||೫||