ಗುರುನಾಥ ಗಾನಾಮೃತ 

ಇಂಥ ಗುರು ನಿಮಗೆಲ್ಲಿ ದೊರಕ್ಯಾನೊ

ರಚನೆ: ಅಂಬಾಸುತ 

ಇಂಥ ಗುರು ನಿಮಗೆಲ್ಲಿ ದೊರಕ್ಯಾನೊ ಈ ಧರೆಯೊಳಗೆ

ಇಂಥ ಗುರು ನಿಮಗೆಲ್ಲಿ ದೊರಕ್ಯಾನೊ ||ಪ||

ಕಾಂತನಂತೆ ಬಂದು ಅನಂತ ಚಿಂತೆಗಳಿಗೆ ಅಂತ್ಯ ಹಾಡಿ

ಅಂತರಂಗವ ನೋಡಿ ಅರಿವಿನ ಜ್ಯೋತಿ ಬೆಳಗುವ ಧೀಮಂತ ||ಅ.ಪ||

ದೃಷ್ಟಿಯಿಂದಲೇ ದುಷ್ಟತನ ಕಳೆವಾ

ಬಹುಶ್ರೇಷ್ಟತೆಯನೆ ಎತ್ತಿಹಿಡಿದು ಪಾಲಿಸಿರಿ ಎನುವಾ

ಪದಪೋಣಿಸಿ ವೇದವಾಕ್ಯಗಳನ್ನದರೊಳಗಿರಿಸಿ

ಪರಮಪದವನ್ನೀಯುವ ಪರಮಪಾವನ ನಾಮಕ ||೧||

ವಿತ್ತವನ್ನೆಂದಿಗೂ ಮುಟ್ಟ್ಯಾನೋ

ಭಕ್ತರ ಚಿತ್ತವನ್ನೆಂದಿಗೂ ಬಿಟ್ಟು ಹೋಗ್ಯಾನೋ

ಅತ್ತು ಕರೆಯಲು ಬೇಕು ಎನ್ನದೆ ಪಕ್ಕದಲ್ಲೇ ತಾನಿದ್ದು

ಚೊಕ್ಕವಾಗಿರಿಸೆಲ್ಲರ ಚಿಕ್ಕತನವ ದೂರಿರಿಸೊ ||೨||

ಮೆರೆದು ಮಹತ್ತೆನಿಸಿಕೊಳ್ಳಾನೊ

ಈ ಚಿನುಮಯಾತ್ಮಕ ಮರೆಯೊಳಗಿನ ಮೂರ್ತಿರೂಪನೊ

ಅಗಣಿತದ ಲೀಲೆಯನು ತೋರುತ ತ್ರಿಜಗ ವ್ಯಾಪಕನಾಗಿ ನಿಂತನೊ

ಸುಜನರಿಗೆ ಸುಮವಾಗಿ ಕಂಡನೆ ದುರ್ಜನರಿಗೆ ಸಿಂಹನೊ ||೩||

ಸಖರಾಯಪುರದೊಳಿಹನೊ

ಆನಂದದಿ ಆತ್ಮಸಖನೆನಿಸಿಹನೊ

ಅವಧೂತನಾಗಿಹನೊ ಆದಿ ಅಂತ್ಯವ ಮೀರಿಹನೊ

ಅಂಬಾಸುತನ ಪದಕೆ ಮುದದಿಂದ ನಲಿದಿಹನೊ ||೪||