ಗುರುನಾಥ ಗಾನಾಮೃತ 

ಆಡಲು ಬಾರೊ ಎನ್ನೊಡನೆ ಸದ್ಗುರುರಾಯ

ರಚನೆ: ಅಂಬಾಸುತ 

ಆಡಲು ಬಾರೊ ಎನ್ನೊಡನೆ ಸದ್ಗುರುರಾಯ

ಬೇಡುತಿಹೆನೊ ಕಾಡದೆ ತಡಮಾಡದೆ ಬೇಗ ||ಪ||

ನೀನಿತ್ತ ಮತಿಯಿಂದ ಕಾಲಕಳೆಯಲಾಗದೆ

ಬೇಸರಗೊಂಡಿಹೆನೊ ಬಹು ತ್ರಾಸೊಳಗೆ ನಾನಿಹೆನೊ

ಲೋಕಜನರ ಒಡನೆ ಆಡಿದರೇನುಂಟು

ಕೇಕೆ ಹಾಕಿ ನಗುವರಯ್ಯ ಅವರು ||೧||

ಕಣ್ಣಾಮುಚ್ಚಾಲೆ  ಚೆಂಡು ಚಿನ್ನಿದಾಂಡಲ್ಲ

ಚಪ್ಪರಿಸೊ ಬಿಸಿಯೂಟ ಉಂಡ ಮೇಲಲ್ಲ

ದಂಡುದಾಳಿಯ ಕೂಡಿ ಸಂಘ ಮಾಡಲ್ಲ

ಗಂಡಾಂತರ ತರುವಾ ದಂಡ ಇಟ್ಟಲ್ಲ ||೨||

ಧರ್ಮವೆಂಬೋ ಮೈದಾನ ಸೇರಿ

ಸಾಧನೆಯೆಂಬೊ ದಾಳವ ಹಾಕಿ

ಅರಿಷಡ್ವರ್ಗವೆಂಭೊ ಕಾಯ ಉರುಳಿಸಿ

ಆನಂದವೆಂಬೊ ಮನೆಯ ಸೇರಲು ||೩||

ಸಖರಾಯಪುರದ ಎನ್ನಾತ್ಮ ಸಖನೇ

ಶ್ರೀವೇಂಕಟಾಚಲ ನಾಮಾಂಕಿತನೇ

ಅಂಬಾಸುತನೊಡಗೂಡಿ ಈಗಲೇ ಬೇಗನೆ

ಆಡೋ ನಲಿದಾಯುವಂತೆ ಮಾಡೋ ||೪||