ಗುರುನಾಥ ಗಾನಾಮೃತ 

ಎನಗೇತರದ ಭಯವೋ ನಿನ್ನಭಯ ಸದಾ ಇರಲು

ರಚನೆ: ಅಂಬಾಸುತ 

ಎನಗೇತರದ ಭಯವೋ ನಿನ್ನಭಯ ಸದಾ ಇರಲು

ಗುರುರಾಯ ಸಖರಾಯಪುರವರಾಧೀಶ್ವರಾ‌||ಪ||

ಆಡಿದವರಾಡಲೀ ದೂರಿದವರು ದೂಡಲೀ

ಕಾಡಿದವರು ಕಾಡಲಿ ಕಣ್ಮುಚ್ಚಿ ನಾನಿರುವೇ ||ಅ.ಪ||

ಹಿರಿಯವನು ನಾನಲ್ಲ ಹಿರಿತವು ಎನಗಿಲ್ಲ

ಕಿರಿತನದ ಮಾತುಗಳಿಂದ ಎನಗೆ ನೋವಿಲ್ಲ

ಪಟ್ಟಕಟ್ಟುತ ಪೆಟ್ಟು ಮಾಡಿದರೆ ಏನಂತೆ

ತಟ್ಟದಾ ಪೆಟ್ಟೆನಗೆ ಸದಾ ಗುರು ಸ್ಮರಿಸುತಿರಲು ||೧||

ಹೆಸರಿನಾಸೆ ಎಂದೂ ಇಲ್ಲ ಕೆಸರಿಗೆ ಮೈಚಾಚೋಲ್ಲ

ವಿತ್ತದಾ ಗಳಿಕೆಗಲ್ಲ ಪದ ವಿರೋಧ ಬೇಕಿಲ್ಲ

ಮನದ ಹಂಬಲವೊಂದೇ ಮುದದಿ ಗುರು ಗತಿ ಎಂದೇ

ಅತಿ ದೀನತನದೊಳಗೆ ಅವನಡಿಯ ಪಿಡಿದಿರಲು ||೨||

ನನ್ನತನ ಉಳಿಸೋಲ್ಲ ನಾನೆಂಬುದ ಮೆರೆಸೋಲ್ಲ

ನೀನೆಂಬುದ ಮರೆಯೋಲ್ಲ  ನೀನೆ ನನಗೆಲ್ಲ

ಅಂಬಾಸುತನ ಈ ಮೊರೆಯನೀ ಆಲಿಸುತಿರಲು

ಅವನ ಅಕ್ಷರ ಪುಷ್ಪ ನಿನ್ನಡಿಯ ಸೇರಿರಲು ||೩||