ಗುರುನಾಥ ಗಾನಾಮೃತ 

ದೂರ ತಳ್ಳಬೇಡ ಅರಿವೆ ದೂರ ತಳ್ಳಬೇಡ

ರಚನೆ: ಅಂಬಾಸುತ 

ದೂರ ತಳ್ಳಬೇಡ ಅರಿವೆ ದೂರ ತಳ್ಳಬೇಡ

ದಾರಿಹೋಕ ನಾನಲ್ಲ ದೈನ್ಯತೆಯನು ಮರೆವುದಿಲ್ಲ ||ಪ||

ಬಾಗಿ ಭೋಗ ಬಿಟ್ಟು ವಿರಾಗಿಯಾಗಿ ಬಂದಿಹೆನು

ರಾಗಿಗಾಗಿ ಅಲ್ಲವೇ ಅಲ್ಲ ತ್ಯಾಗಿಯೆಂದು ಮೆರೆವುದಿಲ್ಲ ||೧||

ಮುಚ್ಚಿಡಲು ಮನಸು ಇಲ್ಲ ಬಿಚ್ಚಿಡಲು ಭಯವು ಇಲ್ಲ

ಬಚ್ಚಿಡಲು ಏನೇನೂ ಇಲ್ಲ ಹುಚ್ಚುತನವೊ ತಿಳಿಯೆನಲ್ಲ ||೨||

ಹೆಣಕೂ ಉಸಿರು ಹಣದಿಂದ ಕ್ಷಣಿಕವೆಂದು ತಿಳಿವುದಿಲ್ಲ

ನೀ ಸಿಗದೇ ನಿಜಸುಖವೂ ಇಲ್ಲ ಸಿಕ್ಕರೆ ಜಗಕೆ ಸಖ ನಾನಲ್ಲ ||೩||

ಮೂರ್ತಿರೂಪವಾಗಿ ನೀನು ಕಾಣುವೆಯಂತೆ ಗುರುವೆನಿಸಿ

ಅಂಬಾಸುತಗೆ ಸರಸವೆನಿಸೊ ಪದದೊಳಗೆ ಅರಸನಾಗಿ ||೪||