ಗುರುನಾಥ ಗಾನಾಮೃತ 

ಹರಸುವ ಹರನೇ ಬಂದ ಭುವಿಗೆ

ರಚನೆ: ಶ್ರೀಮತಿ.ಶೈಲಜಾ ಕುಮಾರ್, ಮೈಸೂರು 

ಹರಸುವ ಹರನೇ ಬಂದ ಭುವಿಗೆ

ಹರನೇ ನರನಾಗಿ ಬಂದ ಧರೆಗೆ |

ಆ ನರನೇ ಗುರುವಾಗಿ ಒಲಿದ ಮನೆಗೆ 

ಗುರುವೇ ಆನಂದ ತಂದ ಬಾಳಿಗೆ ||

ಮಾತೆಯ ಮಮತೆಯ ತೋರುತಾ

ನಗುತಲೆ ತಪ್ಪನು ತಿದ್ದುತಾ |

ಜನರ ಮುಗ್ಧಭಕ್ತಿಯಾ ನೋಡುತಾ

ಭಕ್ತರ  ಸಂಕಷ್ಟಗಳ ಪರಿಹರಿಸುತಾ || ೧ ||

ಮನಶುದ್ಧಿಯಿಂದ ಬಾಳುವೆ ಮಾಡಿರೆನ್ನುತಾ

ಒಮ್ಮನದಿಂದ ಗುರುವನು ಸೇವಿಸಿರೆನ್ನುತಾ |

ಭಾವಶುದ್ಧಿಯಲಿ ಬದುಕನು ಕಳೆಯಿರೆನ್ನತಾ 

ಕರ್ತವ್ಯದಲ್ಲಿ ದೈವವನು ಕಾಣಿರೆನ್ನುತಾ || ೨ ||

ಸಾತ್ವಿಕರಲ್ಲಿ ನಾನಿಹೆ ಎನ್ನುತಾ

ದುರುಳರಿಗೆ ಮನವ ಶುದ್ಧಿಮಾಡಿರೆನ್ನುತಾ |

ಭವದ ಬದುಕನು ಭಕ್ತಿಯ ತೈಲದಿ ಉರಿಸಿರೆನ್ನುತಾ

ಆತ್ಮಸಾಕ್ಷಾತ್ಕಾರದ ‌ದಾರಿಯ ತೋರುತಾ || ೩ ||