ಗುರುನಾಥ ಗಾನಾಮೃತ 

ಉಪವಾಸ ಮಾಡಬೇಕಮ್ಮಾ

ರಚನೆ: ಅಂಬಾಸುತ 

ಉಪವಾಸ ಮಾಡಬೇಕಮ್ಮಾ

ಲೋಕ ಉಪಕಾರಿ ಎಮ್ಮ ಗುರುನಾಥನ ಹೆಸರಲಿ ||ಪ||

ಉಪವೆಂದರೆ ಸನಿಹವಮ್ಮ

ವಾಸವೆಂದರೆ ಇರುವುದಮ್ಮ 

ನಮ್ಮ ಗುರುನಾಥನಾ ನೆನೆದು ಅವನೊಡನಿರುವಂಥಾ ||೧||

ಉದರ ವೈರಾಗ್ಯವೇಕಮ್ಮ

ಮನ ಉದರದಿ ಹಸಿವಿರಬೇಕಮ್ಮ

ನಮ್ಮ ಗುರುನಾಥನಾ ಭಜಿಸೊ ಭಕ್ತಿ ಹಸಿವಿರುವಂಥಾ ||೨||

ದಿನವೆಂಬುದಿದಕೆ ಇಲ್ಲಮ್ಮ

ತಾರೆ ಯೋಗಗಳ ನೋಡಬೇಡಮ್ಮ

ನಮ್ಮ ಗುರುನಾಥನಾ ನಿತ್ಯ ಸೇವಿಪ ಮನವಿರುವಾ ||೩||

ಚಂಚಲತೆಯ ಬಿಡಬೇಕಮ್ಮ

ವಿಷಯವಾಸನೆ ಸುಟ್ಟು ಹಾಕಮ್ಮ

ನಮ್ಮ ಗುರುನಾಥನಾ ನಾಮ ಒಂದೇ ಸಾಕೆನ್ನುವಂಥಾ ||೪||

ಅಂಬಾಸುತನ ಪದ ಕೇಳಮ್ಮ

ಸಖರಾಯಧೀಶನಾ ಎನಿಸಿಹನಾ

ನಮ್ಮ ಗುರುನಾಥನಾ ಪಾದ ಬಿಡದೇ ಪಾಡುತಲೀ ||೫||