ಗುರುನಾಥ ಗಾನಾಮೃತ 

ಪಾಲಿಸಿ ಅವನಾ ಪದಗಳನು

ರಚನೆ: ಅಂಬಾಸುತ 

ಪಾಲಿಸಿ ಅವನಾ ಪದಗಳನು

ಪೂಜಿಸಿರೆಮ್ಮ ಗುರುನಾಥನಾ ||ಪ||

ಪರಮಪಾವನ ಪುಣ್ಯ ಪುರುಷನಾ

ಪರಂಧಾಮ ಅವಧೂತನಾ ||ಅ.ಪ||

ಮಾತಾಪಿತರೆ ಮಹಾದೇವ ದೇವಿಯರು

ಗುರುಹಿರಿಯರೆ ಪರಬ್ರಹ್ಮ ಸ್ವರೂಪರು

ಗುರುತರ ಭಾಗ್ಯವಿದು ಸೇವಿಸೊ ಅವರನು

ಎನುತ ಎಮ್ಮನುದ್ಧರಿಸಿಹ ಗುರುವರನು ||೧||

ಬಯಸಬೇಡ ಭಾವ ಹೊರಹಾಕಬೇಡ

ಆಡಬೇಡ ಮೌನ ನೀ ಬಿಡಬೇಡ

ಹೇಳಬೇಡ ಕಲಿವುದ ನಿಲಿಸಬೇಡ

ಎನುತ ಎಮ್ಮನುದ್ಧರಿಸಿಹ ಗುರುವರನು ||೨||

ನುಡಿಯೊಳು ಮಡಿ ಇರಲಿ ಸದಾ

ಮನದೊಳು ದೈವದ ಗುಡಿ ಇರಲಿ

ದೇಹ ಗುರುವಲ್ಲ ದಾಹ ತರವಲ್ಲ

ಎನುತ ಎಮ್ಮನುದ್ಧರಿಸಿಹ ಗುರುವರನು ||೩||

ಇಚ್ಚೆ ಅವನದು ಚರ್ಚೆ ಅವನದು

ಸ್ವೇಚ್ಚೆಯಿಂದಲಿ ನೀನಿರಬೇಡ

ಕೂಡಿಡಬೇಡ ಅದ ಕೆಡಿಸಬೇಡ

ಎನುತ ಎಮ್ಮನುದ್ಧರಿಸಿಹ ಗುರುವರನು ||೪||

ಕರ್ಮದ ಮರ್ಮವ ನೀನರಿಯೊ

ಧರ್ಮದಿಂದಲೇ ನೀ ನೆಡೆಯೊ

ಶರ್ಮತನದ ಶಕ್ತಿಯ ಅನುಭವಿಸೋ

ಎನುತ ಎಮ್ಮನುದ್ಧರಿಸಿಹ ಗುರುವರನು ||೫||

ಸಖರಾಯಪಟ್ಟಣದ ಗುರುನಾಥ

ಅಂಬಾಸುತನ ಅನವರತ ಪೊರೆವಾತ

ನಿಜಧಾತ ಮುಕ್ತಿದಾತ ಈತ ಶಕ್ತಿಧಾತ

ಅವಧೂತ ಗುರುನಾಥ ಸದ್ಗುರುನಾಥ ||೬||