ಗುರುನಾಥ ಗಾನಾಮೃತ 

ಯೋಗನಿದ್ರೆಯ ಮಾಡೊ ಯೋಗಿವರ್ಯಾ

ರಚನೆ: ಅಂಬಾಸುತ 

ಯೋಗನಿದ್ರೆಯ ಮಾಡೊ ಯೋಗಿವರ್ಯಾ

ಬಹು ರಾಗದಿ ಜೋಗುಳ ಪಾಡುವೆವೊ ಗುರುವರ್ಯಾ ||ಪ||

ಮನದ ತೊಟ್ಟಿಲ ಮುದದಿಂದ ಅಲಂಕರಿಸಿ

ನಿನ್ನ ಮುದ್ದು ಮೂರುತಿಯಾ ಇರಿಸಿ ತೂಗುವೆ ||೧||

ಸದ್ದಾಗದಂತೆ ಅರಿಗಳನ್ನೆಲ್ಲಾ ನಿಗ್ರಹಿಸಿ

ಭಕ್ತಿ ರಸವಾ ಉಕ್ಕಿಸಿ ಪ್ರೇಮದಿ ತೂಗುವೆ ||೨||

ಸಾತ್ವಿಕತೆಯಾ ಸರಪಳಿ ಸಮನಾಗಿ ಬಿಗಿದು

ಆನಂದವೆಂಬೊ ಸುಪ್ಪತ್ತಿಗೆ ಹಾಸಿ ತೂಗುವೆ ||೩||

ಸಖರಾಯಪುರವಾಸಿ ಜೋ ಜೋ

ಅವಧೂತ ಗುರುನಾಥ ಜೋ ಜೋ

ಅಂಬಾಸುತನಾ ಒಡೆಯಾ ಜೋ ಜೋ

ಶ್ರೀವೇಂಕಟಾಚಲನೆ ಜೋ ಜೋ ||೪||