ಗುರುನಾಥ ಗಾನಾಮೃತ 

ಲಾಲಿ ಹಾಡುವೆ ಮಲಗು ಬಾರೊ ಮಗುವಾಗಿ

ರಚನೆ: ಅಂಬಾಸುತ 

ಲಾಲಿ ಹಾಡುವೆ ಮಲಗು ಬಾರೊ ಮಗುವಾಗಿ

ಲೀಲೆ ತೋರಿಹ ಅವಧೂತನೆ ಎನ್ನೊಡಲೊಳು ನಗುವಾಗಿ ||ಪ||

ಭಕ್ತ ಜನರಿಗೆ ಮಾತೆಯಾಗಿ ಮಮತೆಯುಣಿಸಿದೆ

ಕಷ್ಟಕಾಲದಿ ಕರಪಿಡಿದು ಕಣ್ಣೀರು ಒರೆಸಿದೆ

ಇಷ್ಟು ದಣಿದಿಹ ಧಣಿಯೆ ನಿನಗೆ ನಾನೀಗಾ

ಪಾದವೊತ್ತಿ ಪವಡಿಸೆನ್ನುವೆ ಬಾ ಬೇಗಾ ||೧||

ಜಗಕೆ ಅನ್ನವ ಇತ್ತವನೆ ನಿನಗೆ ನಾನೀಗ

ತುತ್ತು ಮಾಡಿ ಉಣಿಸುವೆ ಪರಮಾನ್ನವ

ಕಷ್ಟ ಹರಿಸುವ ದೊರೆಯೆ ನಿನಗೆ ದೃಷ್ಟಿ ತೆಗೆದು

ಇಷ್ಟದಿಂದಲಿ ಈಶ್ವರ ನೀನೇ ಎಂದು ||೨||

ಸಖರಾಯಪಟ್ಟಣದ ಗುರುನಾಥನೇ

ನಿಜಸುಖವೀವಾ ಅವಧೂತನೇ

ಅಂಬಾಸುತನಾ ಮಡಿಲೇರು ಬಾರೊ

ಈ ಲಾಲೀಯ ಕೇಳುತ ಮಲಗು ಬಾರೊ ||೩||