ಗುರುನಾಥ ಗಾನಾಮೃತ 

ಭವದಿ ಏಕೆ ಈ ಶೋಧನೆ ಗುರುನಾಥನೇ

ರಚನೆ: ಶ್ರೀಮತಿ.ಶೈಲಜಾ ಕುಮಾರ್, ಮೈಸೂರು 

ಭವದಿ ಏಕೆ ಈ ಶೋಧನೆ ಗುರುನಾಥನೇ

ಸಾಧನೆ ಮಾಡಿಸೋ ದೇವದೇವನೇ |

ಕರ್ಮವಶದಿ ಜಗದಿ ಬಂದೆ

ಬೆಳಕಿಗಾಗಿ ಎಲ್ಲೆಡೆ ಅಲೆದೆ |

ಫಲವನು ಕಾಣದೆ ನೊಂದೆ

ಗುರುವೇ ಗತಿಯೆಂದು ತಿಳಿದೆ || ೧ ||

ಶರಣೆನ್ನುವೆ ನಿನ್ನ ಪಾದಕೆ

ನಿನ್ನ ನಾಮವೇ ಸಾಕೆನ್ನ  ಮನಕೆ |

ನಿನ್ನ ಸೇವೆಗಿಂತ ಬೇರೆ ಬೇಡ ಜೀವಕೆ

ನಿನ್ನ ದೃಷ್ಟಿಯೇ ಸಾಕೆನ್ನ ಉದ್ಧಾರಕೆ || ೨ ||

ಮನದಲಿಲ್ಲ ನನಗೆ ಗೊಂದಲ

ನೀನೇ ನನ್ನ ಮಾರ್ಗಬಂಧು |

ನೀನೇ ಬೇಕೆಂಬ ನನ್ನ ಹಂಬಲ

ಕರುಣಿಸೋ ನನ್ನ ಆತ್ಮಬಂಧು || ೩ ||

ನನ್ನ ಬದುಕಿಗೆ ನೀನೇ ಆಧಾರ

ನಿನ್ನ ಮಾತೇ ನನಗೆ ಬಂಗಾರ |

ದಾರಿಯ ತೋರೋ ಕರುಣಸಾಗರ

ಮಾಡೆನ್ನ ಪಾದಸಾಯುಜ್ಯದ ಮಂದಾರ || ೪ ||