ಗುರುನಾಥ ಗಾನಾಮೃತ
ಯಾರು ಕಾಯ್ವರೋ ನಿನ್ನ ಹೊರತೆನ್ನ ಗುರುರಾಯಾ
ರಚನೆ: ಅಂಬಾಸುತ
ಯಾರು ಕಾಯ್ವರೋ ನಿನ್ನ ಹೊರತೆನ್ನ ಗುರುರಾಯಾ
ಕರ ಪಿಡಿದು ನೆಡೆಸಲೂ ಓಡಿ ಬಾರೋ ಜೀಯಾ ||ಪ||
ಆರು ಅರಿಗಳು ಸೇರಿ ನಿನ್ನರಿವ ಮರೆಸುತಿವೇ
ಈ ಭವಸಾಗರದೀ ಎನ್ನ ಮುಳುಗಿಸಿವೇ
ಅಂತಃಕರಣದಿಂದಲೀ ನಿನ್ನ ಕರೆದಿಹೆ ಬಾರೋ
ಅರಿಗಳಾ ಮರ್ಧಿಸೀ ಈ ನರನ ಕಾಯೋ ||೧||
ಮಾನಾಭಿಮಾನವಾ ಬಿಟ್ಟು ನಿಲ್ಲುವೆನಯ್ಯಾ
ಧನಕನಕ ಸುಖ ಭೋಗ ನಿನ್ನ ನಾಮ ಎನಗಯ್ಯಾ
ಈ ಹೃದಯ ಮಂದಿರದೀ ನೀ ಬಂದೂ ನಿಲ್ಲಯ್ಯಾ
ಕುಟಿಲತೆಯ ಜಟಿಲತನವಾ ಬಿಡಿಸಿ ನೀ ಕಾಯಯ್ಯಾ ||೨||
ನಿನ್ನ ಪದದ ಪಾದಪೂಜೆಯಾ ಸ್ವೀಕರಿಸೋ
ಈ ಅಂಬಾಸುತನಾ ಕನಿಕರದಿ ಅನುಗ್ರಹಿಸೋ
ಸಖರಾಯಪುರಾಧೀಶಾ ಸದ್ಗುರುನಾಥಾ
ನಂಬಿಬಂದವರ ಕೈ ಬಿಡದೆ ಪೊರೆಯಯ್ಯಾ ||೩||
