ಗುರುನಾಥ ಗಾನಾಮೃತ 

ಬೇಗನೆ ಬಾರೋ ಗುರುನಾಥಾ ಅವಧೂತಾ

ರಚನೆ: ಅಂಬಾಸುತ 

ಬೇಗನೆ ಬಾರೋ ಗುರುನಾಥಾ ಅವಧೂತಾ

ಬಾಧಿಪುದೀ ಭವ ಬಹಳಾಂತ ||ಪ||

ಹುಟ್ಟು ಸಾವಿನ ನಡುವೇ ಕೆಟ್ಟ ರೋಗಾರುಜಿನಾ

ಕಟ್ಟಳೆ ಇಲ್ಲದ ಈ ಬದುಕೂ

ಬಟ್ಟೆ ಕಟ್ಟಿ ಕಣ್ಣಿಗೆ ಅಡವಿಗೆ ಬಿಟ್ಟಂತಾಗಿದೇ

ದುಷ್ಟತನವಾ ಕುಟ್ಟಿ ಕಣ್ತೆರೆಸಲೂ ಬಾರೋ ||೧||

ರಾಮನಾಮ ನೆನೆಯೋ ನಾಲಿಗೆ ರುಚಿ ಹುಡುಕೀ

ನಾನಾ ಕಡೆ ತಿರುಗಿಹುದಯ್ಯಾ

ಕಾಮಾದಿ ದಾನವರು ಪ್ರೇಮ ತೋರುತಾ ಮನವಾ

ಸೆರೆಹಿಡಿದಿಹರೂ ಬಿಡಿಸಲು ಬಾರೋ ||೨||

ಬಂಧುಬಾಂಧವರು ತಾವ್ ಬಂದ್ಹೋದರೂ

ಇದ್ದ ಸಾಧನೆಯಾ ಕದ್ದೊಯ್ದರೂ

ಆತ್ಮಬಂಧು ನಿನ್ನ ಹೊರೆತೂ ನಾ ಯಾರನು ಕಾಣೇ

ಎನ್ನನುದ್ಧರಿಸಲು ನೀ ಬೇಗ ಬಾರೋ ||೩||

ಸಖರಾಯಪುರದಿಂದ ಸದ್ಗುರುನಾಥನೇ

ಅಂಬಾಸುತನ ಈ ಮನಮನೆಗೇ

ಕರುವಾ ದನಿಯಾ ಕೇಳಿ ಬರುವಾ ಧೇನುವಂತೇ

ಕಲಿಯುಗದಾ ಕಾಮಧೇನು ನೀ ಬಾರೋ ||೪||