ಗುರುನಾಥ ಗಾನಾಮೃತ 

ಸುಮ್ಮನಾಗಲಿಲ್ಲವೋ ಎನ್ನ ನಾಲಿಗೇ

ರಚನೆ: ಅಂಬಾಸುತ 

ಸುಮ್ಮನಾಗಲಿಲ್ಲವೋ ಎನ್ನ ನಾಲಿಗೇ

ಬಲು ಹೆಮ್ಮಿಗೆಯಲಿ ಅಬ್ಬರಿಸಿಹುದೀ ನಾಲಿಗೇ ||ಪ||

ದುಷ್ಟತನವನು ಪೊಗಳಿಹುದೀ ನಾಲಿಗೇ

ಬಹು ಶಿಷ್ಟರನು ತೆಗಳುತಿಹುದೀ ನಾಲಿಗೇ

ನಾಮಸ್ಮರಣೆಗೆ ಒಲ್ಲೆ ಎಂಬುದಿ ನಾಲಿಗೇ

ಬಲುಪೊಳ್ಳು ಹಾಡಿಗೆ ರಾಗ ಹಾಕಿಹುದೀ ನಾಲಿಗೇ ||೧||

ಉಪ್ಪುಹುಳಿ ಖಾರಕೆ ಸೋತಿಹುದೀ ನಾಲಿಗೇ

ಸತ್ವಯುತ ಸಪ್ಪೆಯ ಗಂಜಿಯಾ ತ್ಯಜಿಸಿಹುದೀ ನಾಲಿಗೇ

ಅಸುರಪಾನಕೆ ನೀರಾಡಿಸಿಹುದೀ ನಾಲಿಗೇ

ಸುರಸ್ತೋತ್ರಕೆ ಮೂಕವಾಗುವುದೀ ನಾಲಿಗೇ ||೨||

ಅತಿಷಯದ ಅಹಂಕಾರದಿ ಅಂಬಾಸುತನಾ ನಾಲಿಗೇ

ನಾದವಿನೋದದಿ ಕಾಲಕಳೆಯುತಿದೆ ನಾಲಿಗೆ

ಘನ್ನಮಹಿಮಾ ಸಖರಾಯಪುರವಾಸನಾ

ನಾಮವ ಪೇಳದೇ ನರಕಕ್ಕೀಡಾದ ನಾಲಿಗೇ ||೩||