ಗುರುನಾಥ ಗಾನಾಮೃತ 

ಮನ್ನಿಸೆನ್ನ ಅಪರಾಧವ ಸದ್ಗುರುವೇ

ರಚನೆ: ಶ್ರೀಮತಿ.ಶೈಲಜಾ ಕುಮಾರ್, ಮೈಸೂರು 

ಮನ್ನಿಸೆನ್ನ ಅಪರಾಧವ  ಸದ್ಗುರುವೇ

ಮನ್ನಿಸೆನ್ನ ಅಪರಾಧವಾ ||

ಕಾರಣಪುರುಷನು ನೀನೆಂದರಿಯದೆ

ಲೋಕೋದ್ಧಾರಕನು ನೀನೆಂದು ತಿಳಿಯದೆ |

 ಭಕ್ತರುದ್ಧಾರಕೆ ಪಣ ತೊಟ್ಟಿಹೆನೆಂದರಿಯದೆ

ಮನುಷ್ಯಮಾತ್ರದಿಂ ಕಂಡೆನಲ್ಲಾ || ೧ ||

ಬಾಹ್ಯಾಲಂಕಾರಕೆ ಬೆಲೆಕೊಟ್ಟೆನಲ್ಲಾ

ನಿನ್ನ ಆಂತರ್ಯವನರಿಯದಾದೆನಲ್ಲಾ |

ನಿನ್ನ ಮಾತಿನ ಗೂಡಾರ್ಥಗಳ ತಿಳಿಯನಾದೆನಲ್ಲಾ 

‌ನಿನ್ನನೇ ಮೌಢ್ಯತೆಯಿಂ ನೋಡಿದೆನಲ್ಲಾ || ೨ ||

ಪುಣ್ಯಶಾಲಿಗಳಿಗೆ ಒಲಿವನು ನೀನೆಂದರಿಯಲಿಲ್ಲಾ

ನಿನ್ನೊಂದು ದೃಷ್ಟಿಯೇ ಅನುಗ್ರಹವೆಂದರಿಯಲಿಲ್ಲಾ |

ಸದಾ ಪೊರೆವ ಸದ್ಗುರುವೇ ನೀನೆಂದು  ತಿಳಿಯಲೇ ಇಲ್ಲ 

ನಿನ್ನ ಸರ್ವಜ್ಞ ಮಹಿಮೆಯ ತಿಳಿಯಲೇ ಇಲ್ಲ ... || ೩ ||