ಗುರುನಾಥ ಗಾನಾಮೃತ 

ಸಾಕು ಸಾಕು ಬಿಡೋ ನಾನೆಂಬಹಂಕಾರ

ರಚನೆ: ಅಂಬಾಸುತ 

ಸಾಕು ಸಾಕು ಬಿಡೋ ನಾನೆಂಬಹಂಕಾರ

ಭೂಷಣವಲ್ಲ ನಿನಗದುವೇ

ನಿತ್ಯ ದೈವ ಗುರು ಸ್ಮರಣೆಯ ಮಾಡುವೀ

ಅನಿತ್ಯದಾ ಈ ಮಾತೇಕೇ ||

ಹುಟ್ಟಿದೆ ಬರಿಗೈಲಿ ನೀ ನಾಳೇ

ಪೋಗುವೆ ಮತ್ತದೇ ಬರಿಗೈಯಲೀ

ಪುಟ್ಟಿಸಿದವರ್ಯಾರೋ ನಿನ್ನನು ನೆನ್ನೇ

ಪಟ್ಟದ ಮಾತೇಕೆ ನೀನಾಡುವೀ ||

ನೀ ತಿನ್ನೋ ಅನ್ನವ ಬೆಳೆದವರ್ಯಾರೋ

ನೀ ಉಟ್ಟ ವಸ್ತ್ರವ ನೇಯ್ದವರ್ಯಾರೋ

ನೀ ಇಟ್ಟ ವಿತ್ತವ ಕೊಟ್ಟವರ್ಯಾರೋ

ನಾಳೆ ಕಸಿದು ದೂರಿರಿಸುವರ್ಯಾರೋ ||

ನಿನ್ನದೆನುವ ತಂದೆ ತಾಯಿ ಸತಿ ಸುತರು

ಅಮರರೇ ಈ ಜಗದೊಳಗೇ

ನೀ ಕಟ್ಟಿದಾ ಸೌಧ ಬಿರುಕು ಬಿಡದೆಯೇ

ಉಳಿಯುವುದೇ ಕೆಲದಿನದೊಳಗೇ ||

ನೀನೇನ ಸೃಷ್ಠಿಸಿದೆ ನೀನೇನ ಪಾಲಿಸಿದೇ

ಕುಳಿತು ಚಿಂತಿಸು ಮನದೊಳಗೇ

ಲೋಕೋದ್ಧಾರಕ ಪರಮಾತ್ಮನೀ ಕಾರ್ಯಾ

ಮಾಡಿಹನೋ ನಿನಗೆಂದೇ ||

ನೀ ಸುಟ್ಟು ಬೂದಿಯಾಗೆ ಮರೆವರೆಲ್ಲ ನಿನ್ನ

ವೈದೀಕದ ಭಕ್ಷಗಳೊಡನೇ

ನಿನ್ನಿಚ್ಚೆ ಜಗವಿಹುದು ನೀನೆಡೆಸಿದಂತಿಹುದೂ

ಅಂಬೆ ನೀ ಸುತ ನಾ ಎನುತಿರು ಮನವೇ ||