ಗುರುನಾಥ ಗಾನಾಮೃತ 

ಗುರುವೇ ಸಖರಾಯಪುರವರಾಧೀಶಾ 

ರಚನೆ: ಅಂಬಾಸುತ 

ಗುರುವೇ ಸಖರಾಯಪುರವರಾಧೀಶಾ ||ಪ||

ಸಕಲ ಮಂಗಳಕಾರಕ ಸನ್ಮತಿ

ದಾಯಕ ಸುಂದರರೂಪ ಅವಧೂತ ||ಅ.ಪ||

ಸುಜನ ಪೋಷಕ ನೀ ಕುಜನ ವಿನಾಶಕ

ಅಜ ಹರಿಹರರ ಸ್ವರೂಪಾ

ನಿಜಸುಖ ನೀಡೆಂದು ಬೇಡುವೆ ಬಳಿ ಬಂದೂ

ಭಜಕ ಜನ ಮನ ನಿವಾಸನಾ ||೧||

ಅನಾಥ ನಾಥ ಆಪದ್ಭಾಂಧವಾ

ಅತಿಷಯ ಪ್ರೇಮ ಸುದಾಯಕಾ

ಮನ ತಮವನು ಕಳೆಯೋ ಜ್ಞಾನಾದಿತ್ಯಾ

ಮಮತೆಯೆ ಮೂರ್ತಿವೆತ್ತಂತಿರುವಾತ ||೨||

ಸತ್ ಚಿತ್ ಸುಖ ಆನಂದ ಸಾಧಕ

ಭಕ್ತ ರಕ್ಷಕಾ ಭಗವಂತಾ

ಸಾಧು ಸಜ್ಜನರ ಸಂಘದೊಳೆನ್ನನಿರಿಸೀ

ಸಲಹೋ ಸೋಹಂಭಾವವ ನೀಡೀ ||೩||

ನಿತ್ಯ ನಿರುತವೂ ನಿನ್ನನೇ ಭಜಿಪೆನು

ಸತ್ಯಮೂರುತೀ ಗುರುನಾಥಾ

ಅಂಬಾಸುತನಾ ಅಂತರಂಗದ ದೊರೆಯೇ

ಶ್ರೀವೇಂಕಟಾಚಲ ನಾಮಾಂಕಿತನೇ ||೪||