ಗುರುನಾಥ ಗಾನಾಮೃತ 

ಗುರುವೇ ನಿನ್ನ ಕರುಣೆ ಎನ್ನ ಮೇಲಿರಲೀ

ರಚನೆ: ಅಂಬಾಸುತ 

ಗುರುವೇ ನಿನ್ನ ಕರುಣೆ ಎನ್ನ ಮೇಲಿರಲೀ

ಕತ್ತಲೊಳಗೆ ಇಹೆನೋ ನಾನೂ 

ಜ್ಞಾನದ ಹಿಡಿ ಬೆಳಕಾ ನೀ ನೀಡು ||ಪ||

ನಿಜಸುಖವೆಂಬುದ ನಾನರಿಯೇ

ಧನಕನಕದ ಮೋಹದಿ ಸಿಲುಕಿರುವೇ

ಸೋಲು ಗೆಲುವುಗಳಾ ಬದುಕಲಿ ಹುಟ್ಟಿ ಸಾಯುತಲಿರುವೇ ||೧||

ಅರಿವಿನ ದೊರೆಯೂ ನೀನಂತೇ

ಅರಿಯದೆ ನಾ ಹೊಂದಿಹೆ ಚಿಂತೇ

ಅಂತರಂಗದೀ ನಿನ್ನ ನಾ ಅರಿಯದೇ ಬಯಲೊಳು ಹುಡುಕತಲಿಹೆನಂತೇ ||೨||

ಮಾತಿನ ಮನೆಯೊಳಗೇ ನಾನಿಂತೇ

ಮೌನದ ಅರಮನೆಗೇ ಹೊರಗಂತೇ

ನೀನಿಹೆಯಂತೆ ಮೌನದೊಳಗೇ ಮಾತಿನ ಹಂಗು ನಿನಗೇಕಂತೇ ||೩||

ವಿಪರೀತ ವಾದದಲೀ

ಬುದ್ದಿ ಬಹು ಮೊಂಡಾಗುವುದಂತೇ

ವಾದಕೆ ನಿಲುಕದವಾ ನೀನಂತೇ ಮೃದುವಾಣಿಗೆ ಓಡಿ ಬರುವೆಯಂತೇ ||೪||