ಶ್ರೀ ಸದ್ಗುರು ಮಹಿಮೆ   

ಅಧ್ಯಾಯ - 125

    ಗ್ರಂಥ ರಚನೆ - ಚರಣದಾಸ 

ಕರುಣೆಯ ಕಡಲು 

ಸ್ವಾತ್ಮಾ ರಾಮಂ  ನಿಜಾನಂದಂ ।
ಶೋಕ ಮೋಹ ವಿವರ್ಜಿತಂ ।।
ಸ್ಮರಾಮಿ ಮನಸಾ ನಿತ್ಯಂ ।
ವೆಂಕಟಾಚಲ ದೇಶಿಕಂ ।।

ಸದ್ಗುರು ಕೇವಲ ಭಕ್ತರ ಕೂಗಿಗೆ ಮಾತ್ರವೇ ಓಗೊಡುವುದು ಮಾತ್ರವಲ್ಲ. ಸೃಷ್ಠಿಯ ಸಕಲ ಚರಾಚರಗಳೆಲ್ಲದರ ಕಷ್ಟಗಳಿಗೂ ಸ್ಪಂದಿಸುವನು. ಅದುವೇ ಸದ್ಗುರುವಿನ ಲಕ್ಷಣ. 

ಗುರುವಿಗೆ ಕಾಲ ದೇಶಗಳ ಮಿತಿ ಇಲ್ಲ. ಆತ ಸರ್ವಾಂತರ್ಯಾಮಿ ಅನಂತ ರೂಪಿ. 

ಒಮ್ಮೆ ಗುರುನಾಥರು ಭಕ್ತರೋರ್ವರ ಕಾರಿನಲ್ಲಿ ಮೈಸೂರಿನ ಕಡೆಗೆ ಹೊರಟಿದ್ದರು. ದಾರಿಯಲ್ಲಿ ಹಳೇಬೀಡು ಕೆರೆಯನ್ನು ನೋಡಿ "ಅಯ್ಯಾ ಕಾರು ನಿಲ್ಲಿಸು" ಎಂದರು ಕೆಳಗಿಳಿದರೆ ಬತ್ತಿ ಹೋಗಿದ್ದ ಕೆರೆಯನ್ನು ನೋಡಿ ಮರುಗಿ "ಅಯ್ಯಾ ಒಂದು ಹನಿ ನೀರಿಲ್ಲ. ಪಶು ಪಕ್ಷಿಗಳ ಕತೆ ಏನಾಗಬೇಕು? ನೀರು ಬರಬೇಕು ಕಣಯ್ಯಾ" ಎಂದು  ನುಡಿದು ಕೆರೆಗೆ ಪೂಜೆ ಸಲ್ಲಿಸಿ ಹೊರಟು ಹೋದರು. 

ಹಾಗೆಯೇ ಬಹುಶಃ 1980 ರ ದಶಕದಲ್ಲಿ ಉತ್ತರ ಕರ್ನಾಟಕದ ಭರಮ ಸಾಗರ ಕೆರೆ ಸಂಪೂರ್ಣವಾಗಿ ಬತ್ತಿ ಹೋಗಿತ್ತು. ಆ ಊರಿನ ಜನಗಳು ಗುರುನಾಥರ ಮಹಿಮೆಯ ಬಗ್ಗೆ ತಿಳಿದು ಗುರುನಿವಾಸಕ್ಕೆ ಬಂದು ಬತ್ತಿಹೋದ ಕೆರೆಯ ಕುರಿತು ವಿನಂತಿಸಿದರು. 

ಆಗ ಭರಮಸಾಗರಕ್ಕೆ ತೆರಳಿದ ಗುರುನಾಥರು ಒಂದು ಸಣ್ಣ ಬಲೆಯಲ್ಲಿ ಸ್ವಲ್ಪ ಮರಳನ್ನು ಹಾಕಿ "ಶ್ರೀರಾಮ ಜಯರಾಮ" ನಾಮ ಜಪಿಸುತ್ತಾ ಸಮೀಪದ ಆಂಜನೇಯ ದೇಗುಲದಲ್ಲಿ ಇಟ್ಟು ಬಂದರು ಅದಾಗಿ ಕೆಲವೇ ದಿನಗಳಲ್ಲಿ ಧಾರಾಕಾರ ಮಳೆಯಾಗಿ ಕೆರೆ ತುಂಬಿತ್ತು. ಮಾತ್ರವಲ್ಲ ಇಂದಿಗೂ ಆ ಕೆರೆ ಬತ್ತಿಲ್ಲ. ಇದು ಗುರು ಕಾರುಣ್ಯದ ಸಂಕೇತವೆಂದು ಆ ಊರಿನ ಗುರುಭಕ್ತರೊಬ್ಬರು ಚರಣದಾಸನಾದ ನನಗೆ ತಿಳಿಸಿದರು. 

ಆಶ್ಚರ್ಯವೆಂದರೆ ಅವರು ಮೈಸೂರು ತಲುಪಿ ಒಂದೆರಡು ದಿನ ಬಿಟ್ಟು ತಿರುಗಿ ಬರುವಾಗ ಕೆರೆಯಲ್ಲಿ ನೀರು ತುಂಬಿತ್ತು. ಹಾಗಾದರೆ ಆ ಬತ್ತಿದ ಕೆರೆಯಲ್ಲಿ ನೀರು ತುಂಬಿದವರಾರು? ಎಂಬ ಪ್ರಶ್ನೆಗೆ ಉತ್ತರ ಕೇವಲ ಗುರುವೆಂಬ ದೃಢಭವ ಮಾತ್ರವೇ....

ಗುರುನಾಥರು ನಾನು ಕಂಡಂತೆ ಯಾವುದೇ ಸಭೆ ಸಮಾರಂಭಗಳಿಗೆ ಹೋಗುತ್ತಿದ್ದುದು ಕಡಿಮೆ. ಕಾರ್ಯಕ್ರಮದ ಹಿಂದಿನ ದಿನ ಇಲ್ಲವೇ  ಕಾರ್ಯಕ್ರಮವಾದ ನಂತರ ಹೋಗಿ ಬರುತ್ತಿದ್ದರು. 

ಇನ್ನು ಭಾಷಣ ಪ್ರವಚನವೆಂದು ವೇದಿಕೆ ಹತ್ತಿದ ಉದಾಹರಣೆಗಳಿಲ್ಲ. 

ಆದರೆ ಊರಿನಲ್ಲಿ ಪುಟ್ಟ ಮಕ್ಕಳು ಆಚರಿಸುತ್ತಿದ್ದ ಗಣಪತಿ ಉತ್ಸವಕ್ಕೆ ಹೋಗಿ ತನ್ನ ಖರ್ಚಿನಲ್ಲೇ ಮಕ್ಕಳಿಗೆ ಸಿಹಿ ತಿನಿಸುಗಳನ್ನು ನೀಡಿ ಒಂದೆರಡು ಕಿವಿ ಮಾತು ಹೇಳಿ ಬರುತ್ತಿದ್ದರು. ಆಗೆಲ್ಲಾ ನಿಜಕ್ಕೂ ಅವರೂ ಮಕ್ಕಳೇ ಆಗಿ ಬಿಡುತ್ತಿದ್ದರು. ಅವರ ಈ ಮುಗ್ಧ ಮನಸ್ಸಿಗೆ ಬಹುಶಃ ಅವರೇ ಸರಿಸಾಟಿ. 

ಅವರು ಎಂದೂ ತಮ್ಮನ್ನು ಗುರು ಎಂದಾಗಲಿ ಅಥವಾ ಬೇರಾವ ಹೆಸರಿನಿಂದಾಗಲಿ ಎಂದೂ ಕರೆದುಕೊಂಡಿರಲಿಲ್ಲ. ಹೆಚ್ಚೆಂದರೆ ತಾನೊಬ್ಬ ಭಿಕ್ಷುಕ ಅಥವಾ ಹುಚ್ಚ ಎಂದು ಹೇಳಿಕೊಳ್ಳುತ್ತಿದ್ದರು. 

ಒಮ್ಮೆ ಅವರು ರೈಲಿನಲ್ಲಿ ಬೆಂಗಳೂರಿನ ಕಡೆಗೆ ಪ್ರಯಾಣ ಮಾಡುವ ಸಂದರ್ಭ ಬಂದಿತು. ರೈಲಿನಲ್ಲಿ ಕುಳಿತ ಅವರನ್ನು ಒಬ್ಬ ಎರಡೂ ಕಾಲಿರದ ಕುಂಟನು ಬಂದು ಗುರುನಾಥರ ಪಾದಕ್ಕೆ ನಮಸ್ಕರಿಸಿ ಅಳುತ್ತಾ ಹೀಗೆ ಕೇಳಿದ್ದನು. "ಹೇ ಭಗವಂತಾ, ನನ್ನ ಯಾಕೆ ಈ ಪರಿಸ್ಥಿತಿಗೆ ತಂದೆ?" ಎಂದು. ಗುರುನಾಥರು ಒಂದೂ ಮಾತನಾಡದೇ ಆತನಿಗೆ ಆಶೀರ್ವದಿಸಿ ಎಲ್ಲರಿಗೂ ಹಣ್ಣನ್ನು ಹಂಚಿ ಬಂದಿದ್ದರು......,,,,,,,,,,,

ಹೆಚ್ಚಿನ ಮಾಹಿತಿಗಾಗಿ ಗುರು ಬಂಧುಗಳು ಶ್ರೀ ಸದ್ಗುರು ಮಹಿಮೆ ಕನ್ನಡ ಮತ್ತು ಇಂಗ್ಲೀಷ್ ಗ್ರಂಥವನ್ನು ಪರಾಂಬರಿಸುವುದು..... 

।। ಶ್ರೀ ಗುರು ವೆಂಕಟಾಚಲ ಶರಣಂ ಪ್ರಪದ್ಯೇ ।।

For more info visit :  http://srivenkatachalaavadhoota.blogspot.in/