ಗುರುನಾಥ ಗಾನಾಮೃತ 

ಸುದ್ಧಿ ಕಳುಹಿಸಿಹನೆಮ್ಮ ಗುರುನಾಥನೀಗ

ರಚನೆ: ಅಂಬಾಸುತ 

ಸುದ್ಧಿ ಕಳುಹಿಸಿಹನೆಮ್ಮ ಗುರುನಾಥನೀಗ

ಬದ್ಧರಾಗಿರಿ ನೀವು ಸಿದ್ಧರಾಗಿರಿ ನೀವು ಬುದ್ಧಿವಂತಾಗಿರಿ ನೀವು ಎನುತಾ ||ಪ||

ತಂದ ಹೊರೆ ಪುಣ್ಯದಿಂದ ಮಾನವರಾಗಿರುವಿರಿ

ತಂದೆ ತಾಯಿಯ ಮಮತೆಯಿಂದ ಸುಖಿಸಿರುವಿರಿ

ಮತ್ತೆ ಬಂಧು ಬಾಂಧವರ ಕೂಡಿ ನಲಿದಿರುವಿರಿ

ಮೆತ್ತಗಾಗುವ ಕಾಲ ಮುಂದಿದೆ ಮರೆಯದಿರಿ ಎಂದು ||೧||

ಹಗಲಿರುಳೆನ್ನದೆ ದುಡಿದು ಹಣ ಕೂಡಿಟ್ಟಿರುವಿರಿ

ಧನ ಧಾನ್ಯ ಸಂಪತ್ತ ಸಂರಕ್ಷಿಸಿರುವಿರಿ

ಅನುರಾಗ ಅನುಭಾವ ಅನುಭೋಗದಿಂದಿರುವಿರಿ

ಅನುಮಾನವಿಲ್ಲ ಅಪಮಾನ ಮುಂದಿಹುದೆಂದು ||೨||

ಮೆರೆಯದಿರಿ ಮುರಿಯದಿರಿ ಮನ್ನಿಸುವುದ ಮರೆತೀರಿ

ಮರಣವೆನಗಿಲ್ಲವೆಂದು ಮಾತನಾಡಿರುವೀರಿ

ಕಡಿಯೆ ಹೊರಟಿರುವಿರಿ ಕಳ್ಳತನ ಮಾಡಿದಿರಿ

ಕುಹಕವಾಡಿದ ನಿಮಗೆ ಕರ್ಮ ಕೂಡಿಹುದೆಂದು ||೩||

ಸಖರಾಯಪುರದಿಂದ ಸೂಚನೆ ಎಂಬಂತೆ

ಸದ್ಗುರುನಾಥನು ಆಗ್ರಹದಿಂದಲೀ

ಅಂಬಾಸುತಗೆ ಅರಿವಾ ನೀಡುತಾ ಈ ತೆರದಿ

ಶ್ರೀವೇಂಕಟಾಚಲ ನಾಮಾಂಕಿತ ಅವಧೂತಾ ||೪||