ಗುರುನಾಥ ಗಾನಾಮೃತ 

ಸದ್ಗುರುನಾಥನಿಗರ್ಪಣೆ ಯಾತ್ರೆ

ರಚನೆ: ಅಂಬಾಸುತ 

ಸದ್ಗುರುನಾಥನಿಗರ್ಪಣೆ ಯಾತ್ರೆ

ಸದ್ಗುರುನಾಥನಿಗೆ ಅರ್ಪಣೆ ||ಪ||

ಸದ್ಗುರುನಾಥನಿಗೆ ಸಖರಾಯಪುರವಾಸಿಗೆ

ಆತ್ಮಸುಖವಾ ನೀಡೊ ಎನ್ನಾತ್ಮ ಸಖನಿಗೆ ||ಅ.ಪ||

ತನು ಮನವ ದಂಡಿಸಿ ತೋರುವಿಕೆಯಾ ಅಳಿಸಿ

ತಮ ತಾರತಮ್ಯವ ಅಳಿಸೊ ಅಡಿಯಿಟ್ಟಂತಹ ||೧||

ಪದರಕ್ಷೆ ಪಡೆದು ಬಾಹ್ಯ ಪಾದರಕ್ಷೆ ತೊರೆದು

ಗುರುವಿತ್ತ ಪದಗಳ ಪೋಣಿಸುತ ಬಂದಂತಹ ||೨||

ಜ್ಞಾನ ವೀಣೆಯ ಹಿಡಿದು ಲಯದ ತಾಳವ ಬಡಿದು

ಭಕ್ತಿ ಮಾರ್ಗದಿಂದಲಿ ಮುಕ್ತಿ ಮಂಟಪದತ್ತ ನೆಡೆವ ||೩||

ಪರಮಹಂಸರ ಕೃಪೆಯಿಂದ  ಪ್ರಾರಂಭಿಸಿ

ನಾಲ್ಕಾಶ್ರಮಾ ಮೀರಿದಾ ಅವಧೂತನೆಡೆಗೆ ನೆಡೆದ ||೪||

ಅಂಬೆಯ ಸುತನಾಗಿ ಆನಂದ ಬೇಡುತಲಿ

ಅಂತರಂಗದ ದೊರೆ ಅವಧೂತನ ಕಾಣ ಹೊರಟ ||೫||