ಗುರುನಾಥ ಗಾನಾಮೃತ 

ಮುನಿದು ಮುಖವ ಗಂಟಿಕ್ಕುವೆಯೋ

ರಚನೆ: ಅಂಬಾಸುತ 

ಮುನಿದು ಮುಖವ ಗಂಟಿಕ್ಕುವೆಯೋ

ಗುರುವೇ ನಿನಗೆ ಸರಿ ಇದು ಏನೋ?

ತರಳರ ತಪ್ಪನು ಮನ್ನಿಸದೆ

ಮೌನವಾಗಿರುವುದು ಸರಿಯೇನೋ? ||ಪ||

ಹುಡುಗುತನದಲಿ ತುಡುಕತನವ

ಗಡಬಡಿಸುತಲಿ ಮಾಡಿದೆನೆಂದು

ನೇಮ ಮುರಿದು ನಾರೀಮಣಿಯ

ಹೆಸರ ಹಿಡಿದು ಕೂಗಿದೆನೆಂದೂ ||೧||

ಹಸಿವ ತಡೆಯದೆ ಹುಸಿಯಾ ನುಡಿದು

ಕಸಿವಿಸಿಯಲಿ ಉಂಡೆನೆಂದು

ಮಡಿಯಲಿರದೆ ಮಾಧವನಾ

ಚರಣಕರ್ಚನೆ ಮಾಡಿದೆನೆಂದೂ ||೨||

ಪತ್ರೆ ತರಲು ಹೋಗುವೆನೆಂದು

ಪಾಠ ಬಿಟ್ಟು ಹೋದೆನೆಂದು

ಪದವ ಜೋಡಿಸೊ ಗೀಳಲಿ ಬಿದ್ದು

ಪಾದಸೇವೆಯ ಮರೆತೇನೆಂದೂ ||೩||

ಸಖರಾಯಪುರವಾಸನೆ ನಿನ್ನ

ಸಖನೆಂದು ಕರೆದೇನೆಂದು

ಅಂಬಾಸುತನ ಪದಗಳೊಳಗಿನ

ಭಾವವನ್ನು  ಅರಿಯೆ ಎಂದೂ ||೪||