ಗುರುನಾಥ ಗಾನಾಮೃತ 

ಭೋಗಿಯಲ್ಲವೊ ಎನ್ನ ಗುರುನಾಥ

ರಚನೆ: ಅಂಬಾಸುತ 

ಭೋಗಿಯಲ್ಲವೊ ಎನ್ನ ಗುರುನಾಥ

ಭವರೋಗ ಹರಿಸುವ ವಿರಾಗಿ ಮಹಾಯೋಗಿ ||ಪ||

ಅರಿಯದವನಾ ಅರಿವಿಗೆ ಇವ ಸಂಸಾರಿ

ಅರಿತವರಿಗೆ ಇವನೇ ಮುರಾರಿ

ಲೋಕಬಂಧವಿರದ ನಾಕದ ಅಧಿಕಾರಿ

ಸೋಹಂಭಾವದಿಂದಿರುವ ಮನಸಂಚಾರಿ ||೧||

ಮಗುವಾಗಿ ನಕ್ಕಾನೊಮ್ಮೆ ಗದರಿಸಿ ನುಡಿದಾನೊಮ್ಮೆ

ಲಘುತನವ ಗುರುವಾಗಿ ಅಳಿಸಿಹನೆ

ಹಂಗಿರದ ರಂಗಿರದ ಸತ್ಸಂತದೊಡೆಯಾನು

ಮಂಗಮಾಯವಾಗೊ ದೇಹ ಭಾವಾವ ಕಳೆದಾನೊ ||೨||

ಆನಂದರೂಪ ನಿಜಾನಂದ ನೀಡುತಾ

ಜಗದಾನಂದದ ಸವಿಯನ್ನೇ ಉಣಿಸ್ಯಾನೊ

ಮಾಯಾಪಾಶಗಳ ಮರೆಮಾಚಿಸೀ ಬೇಗ

ಮಹಾದೇವ ತಾನಾಗೇ ಎಮಗೆ ಕಂಡ್ಯಾನೊ ||೩||

ಸಖರಾಯಪಟ್ಟಣದೊಳಗೆ ಮೆರೆಯುತ್ತಾ

ಸಖರಾಗಿ ಸತ್ಶಿಷ್ಯರನು ಪೊರೆದಾನು

ಅಂಬಾಸುತನಿಂ ನಿತ್ಯ ಪದಸೇವೆ ಪಡೆಯುತ್ತಾ

ಪಾದಪಂಕಜದ ದರುಶನ ನೀಡ್ಯಾನು ||೪||