ಗುರುನಾಥ ಗಾನಾಮೃತ 

ಹರಿವಾಣ ಸೇವೆಯ ನಿನಗೆ ಅರ್ಪಿಸುವೆನು ಹರಸೊ ಗುರುವೆ

ರಚನೆ: ಅಂಬಾಸುತ 

ಹರಿವಾಣ ಸೇವೆಯ ನಿನಗೆ ಅರ್ಪಿಸುವೆನು ಹರಸೊ ಗುರುವೆ

ಹರಿಯು ನೀನೇ ಹರನು ನೀನೇ ಅಜನು ನೀನೇ ಎನ್ನುತ್ತಾ ||ಪ||

ಅಭಿಷೇಕ ಅಲಂಕಾರ ನಿವೇದನೆ ಆರತಿಗಳ ಮಾಡಿ

ಸಡಗರದಿ ಸಂಭ್ರಮದಿ ಸರ್ವ ಭಕ್ತರನ್ನೊಡಗೂಡೀ ||೧||

ಧೇಹಿ ಧೇಹಿ ಎನುತಾ ಕರವ ಚಾಚಿ ನಿನ್ನಡಿಯಲ್ಲೀ ಬೇಡಿ

ಸೇವೆ ಮಾಡುವೆ ಸೇವ್ಯ ಸೇವಕ ಭಾವವೀಯೊ ಗುರುವೇ ಎನುತಾ ||೨||

ಬಂಗಾರದ ಹರಿವಾಣದಲಿ ನಿನ್ನ ಪದಪಂಕಜದೊಳಗಿಟ್ಟಾ

ತುಳಸಿ ಪತ್ರೆ ಪುಷ್ಪಗಳನು ಇರಿಸಿ ಶಿರದ ಮೇಲೆ ಹೊತ್ತು  ||೩||

ತಾಳ ವೀಣೆಯ ಧರಿಸೀ ಕರದಿ ನಿನ್ನ ನಾಮವ ಪಾಡುತಲಿ

ಲಯಗೊಳಿಸೊ ನಿನ್ನೊಳಗೆನ್ನಾ ಎನುತ ಲಯಬದ್ದನಾಗಿ ||೪||

ಸಖರಾಯಪುರವಾಸಿ ಗುರುವೇ ಅಂಬಾಸುತನಾ ದೊರೆಯೇ

ಸರ್ವ ಸೇವೆಯ ಅರ್ಪಿಸುವೆನೊ ಸಂತ ಸೇವೆಯ ಎನಗೀಯೋ ||೫||