ಗುರುನಾಥ ಗಾನಾಮೃತ 

ವೇಂಕಟಾಚಲನೆಂಬ ಸಾಹುಕಾರ

ರಚನೆ: ಅಂಬಾಸುತ 

ವೇಂಕಟಾಚಲನೆಂಬ ಸಾಹುಕಾರ

ಸಖರಾಯಪುರದೊಳು ಅವನ ವ್ಯವಹಾರ ||ಪ||

ಭಕ್ತರ ಆತ್ಮೋದ್ಧಾರವೆ ಇಲ್ಲಿ ವ್ಯಾಪಾರ

ನಗದು ನಾಣ್ಯವೆಂಬುದಿಲ್ಲಿ ಆಚಾರ ವಿಚಾರ ||ಅ.ಪ||

ಮನದೊಳಗಿರಿಸದೆ ಇದ್ದರೆ ಯಾವುದೆ ವಿಕಾರ

ತೋರುವ ಆ ಸಾಹುಕಾರ ನಿಜ ಮಮಕಾರ

ಮರೆತು ಬಿಡಿ ಇಲ್ಲಿ ಭವದಾ ಸಮಾಚಾರ

ಎಮ್ಮನುದ್ಧರಿಸದೆ ಬಿಡನು ಆ ಗುರುವರ ||೧||

ಧೃಢಭಕ್ತಿ ಎಂಬುದೀ ವ್ಯವಹಾರಕೆ ಆಧಾರ

ಬಯಸನು ಸಾಹುಕಾರ ಎಂದಿಗೂ ಪ್ರಚಾರ

ಮೋಸ ವಂಚನೆ ಇಲ್ಲಿಗೆ ಬಾರದೊ ಬಾ ಧೀರ

ಆನಂದವೆಂಬುದು ಎಲ್ಲೆಂದಿಗೂ ಸ್ಥಿರ ||೨||

ಉಸುರುವನು ಗುರುವಿಲ್ಲಿ ಮೋಕ್ಷಸಾರ

ಸಾಹುಕಾರನಾ ಮಾತು ಮುತ್ತಿನಾ ಹಾರ

ಆ ಹಾರವೆ ನಮಗೆ ಲಾಭದ ಅಲಂಕಾರ

ಕರೆದು ತನ್ನಿರಿ ಬೇಗ ಇಲ್ಲಿಗೆ ಅರಿವಿರದವರ ||೩||

ಈ ಸಾಹುಕಾರನಿಂದ ಎಲ್ಲರಾ ಹಣೆಬರ

ಕಳೆದು ಅಳಿಸಿದನವ ಅಹಂಕಾರ

ಅಂಬಾಸುತನೆಂದಿಗೂ ಆ ಸಾಹುಕಾರನ ಅನುಚರ

ಅವನಿಂದಲೇ ಈ ಲೋಕದ ಉದ್ಧಾರ ||೪||