ಗುರುನಾಥ ಗಾನಾಮೃತ 

ಅರಸು ಅರಿವ ಅರಸು ಅರಿವ

ರಚನೆ: ಅಂಬಾಸುತ 

ಅರಸು ಅರಿವ ಅರಸು ಅರಿವ

ಅರಿತು ಅರಸನಾಗೊವರೆಗು ||ಪ||

ಮರೆತು ಬೆರೆತು ಕಲಿತು ಕುಳಿತು

ಕೇಳಿ ಹೇಳುವಾವರೆಗು ||ಅ.ಪ||

ನಿದಿರೆ ಬಿಟ್ಟು ಮದಿರೆ ಬಿಟ್ಟು

ಹೆದರಿ ಹೆದರಿಸುವುದಾ ಬಿಟ್ಟು

ಬೆರಗ ಮನಸಿನೊಳಗಿಟ್ಟು

ಸೊರಗಿ ಮರುಗಿ ಮೂಖನಾಗಿ ||೧||

ಸುಟ್ಟು ಆರು ಕಟ್ಟಿ ನೂರು

ಮೆಟ್ಟಿ ಮಟ್ಟ ಮಾಡಿ ಸೂರು

ಜಗಜ್ಜಟ್ಟಿ ಪಾದ ಗಟ್ಟಿ

ಪಿಡಿದು ಪಾವನನಾಗಿ ||೨||

ವಕ್ರತೆಗೆ ವಿರಾಮ ಹಾಕಿ

ಚಕ್ರದೊಡನೆ ತಿರುಗು ನೂಕಿ

ಸಕ್ರಮದಿ ಹಸಿವ ನೂಕಿ

ಏಕತಾನದಿ ಐಕ್ಯನಾಗಲು ||೩||

ಪದಕೆ ಪದ ಪೋಣಿಸುತಾ

ಗುರುಪದವ ಧ್ಯಾನಿಸುತಾ

ಅಂಬಾಸುತನ ಈ ಮಾತ ನೆನೆಯುತಾ

ಅಂಬಿಕೆಯೊಡಲಾಳ ಸೇರಲು ||೪||